MA MA THIRI (မမသီရိ)

Thursday, March 25, 2010

အဲဒီနေ့က..

မမျှော်လင့်ခဲ့ဘူး..
မထင်မှတ်ခဲ့ဘူး..
စိတ်မကူးဖူးဘူး..

အလင်းတန်းနှစ်ခု ဖြတ်ကနဲ ဆုံခဲ့မိပြီးတဲ့အခိုက်.
အာရုံခံပြူတင်းက ဦးနှောက်ကို သတင်းပို့တယ်..
အဲဒီသတင်း လက်ခံပြီးတဲ့ ခဏ
ထိမ်းချုပ်ခန်းက ခလုပ်တွေ အလုပ်မလုပ်နိုင်မီခင်လေး
နှလုံးသား ဆီ ဒိုင်း။။ ကနဲရောက်..

ရင်ထဲမှာ..
တော်လဲတယ်
ငလျင်လှုပ်တယ်
မုန်တိုင်းတိုက်တယ်
မိုးကြိုးပစ်တယ်
မီးတောင်တွေ ပေါက်ကွဲတယ်
ရေခဲတောင်တွေ ပြိုကျတယ်
ခြေ လက်တွေ အေးစက်ကုန်တယ်..

ထိုင်ခုံ နောက်မှီပေါ် ဖြည်းဖြည်းလေး မှီချ..
ကွန်ပျူတာ ကီးဘုတ်ပေါ်က လက်တွေ လျော ကျ...

ကမူးရှူးထိုး... Chat box လေးကိုကြည့်ပြီး

စကားလေး တခွန်းသာ ပြောနိုင်တော့တယ်..

ချစ်တယ်...။

မမသီရိ
၂၅.၂.၂၀၁၀

Thursday, March 18, 2010

၁၂ လ ရာသီ

နှင်းတွေက ...
တနှစ်မှာ တရာသီဝေတယ်...
....
မြူတွေက
တနှစ်မှာ တရာသီ ဆိုင်းတယ်....

မိုးစက်တွေ က ...
တနှစ်မှာ တရာသီ ကြွေတယ်...
..
အလွမ်းတွေ ကျတော့ ..
ရာသီတိုင်း .ရိုင်းနေအောင် ပွင့်..လို့...။

မမသီရိ (၃၀.၁.၂၀၁၀)

Monday, March 15, 2010

မေမေ သာ စိတ်မရှည်လို့ကတော့
မမ က ဘယ်လိုလုပ်ပြီး လှပခဲ့မလဲ မေမေရယ်

ခုတော့
ပန်းတွေကို မွှေးခွင့်ရခဲ့တယ်
နေရောင်ခြည်ကို နမ်းခွင့်ရခဲ့တယ်

မိုးကောင်းကင်ကြီးရဲ့အောက်မှာ
လွမ်းနေရပေမဲ့ မမ ပျော်ပါတယ် မေမေ

မေမေ့ ကျေးဇူးကြောင့်
ပန်းကလေးတွေ ဖူးပွင့်အောင် လုပ်ခွင့် ရခဲ့တယ်

ဖယောင်းပန်းပုလေးတွေသွန်းခွင့်ရခဲ့တယ်

အရောင်မဲ့မျက်ဝန်းတွေ လင်းလက်စေနိုင်ခဲ့တယ်

အဲဒီအပြုံးမျက်နှာလေးတွေကြောင့်
ဘ၀ ဟာ နေပျော်လို့

မမ က လူဖြစ်ကျိုးနပ်ပါတယ် မေမေ

အရာရာ တိုင်းအတွက်
ဒီလောကကြီးထဲ ပို့ပေးခဲ့တဲ့ အတွက်
ကျေးဇူးပါမေမေ..။

မမသီရိ
၁၅.၃.၂၀၁၀

Thursday, March 11, 2010

မင်းက မချစ်ပါနဲ့ ကွယ် ဆိုတိုင်း..

မင်းကမချစ်ပါနဲ့ ကွယ် ဆိုတိုင်း..
ရပ်ဆိုင်းပစ်လိုက်ရအောင်လို့..
ငါ့ အသဲနှလုံး က ကွန်ပျူတာ တလုံးမှ မဟုတ်တာကို....

သိမ်းချင်တဲ့အခါ သိမ်း..
ဖျက်ချင်တဲ့အခါ ဖျက်လို့ ရတဲ့
ပရိုဂရမ် တခုဖြစ်ခဲ့ ရင်တော့ တမျိုးပေါ့ ချစ်သူရယ်...

လူထူထူ လမ်းမပေါ် ရောက်တော့
ဆံပင်ရှည်ရှည်.. စမတ်ကျကျ ကောင်လေးတွေ
မင်း ဖြစ်နေမလား... ရင်ခုန်ရင်း ငေးမိ...
(တကယ်တော့ မင်းက စမတ်ကျသူလဲ မဟုတ်ပဲနဲ့..)

လူခပ်ရှင်းရှင်းပန်းခြံတွင်း လမ်းလျှောက်...
အရောက်ပျောက်လု ခုံ တန်းလေးပေါ် ထိုင်ခိုက်
ကိုယ့်ပုခုံးကိုများ တယောက်ယောက် လာဖက်လေသလား..
ကယောင်ချောက်ချား ထင်မှတ်မှားမိ.တာ က ခဏခဏ

အဲဒီတယောက်က မင်းကလွဲ လို့ ဘယ်သူ ဖြစ်အုံးမလဲ..

မော်နီတာ ဒက်စတော့ထောင့်မှာ
မိန့်မိန့်ကြီး ပြုံးရင်း...
ပြုံးပြုံးကြီး နဲ့ ငါ့ကို..
ငါ အလုပ်လုပ်တာ ထိုင်စောင့်ကြည့်နေတာ
မင်းပဲ မဟုတ်လား ချစ်သူလေး ရဲ့..

မင်းက နေ၀င်ရာ အရပ်ဆီမှာ ရှိတယ်
ငါ နေထွက်ရာ အရပ်ဆီမှာ ရှိတယ်..
ဒါပေမဲ့ ကမ္ဘာကြီးက လုံးနေတော့.. ငါတို့ ဘယ်မှာဝေးလို့လဲ..

မင်းက ညတွေကို မုန်းတယ် မုန်းတယ် ပြော၇င်း
အဲဒီညတွေ ကို ဖက်တွယ်ထားတယ်
(အိပ်မပျော်ဘူး..လို့..ငါ့ကို ပြောခဲ့တာ ခဏခဏ)

ငါက လရောင်တွေ ကို ချစ်တယ်.. ချစ်တယ်.. ပြောပြီး
အဲဒီ လရောင်အောက်မှာ ငို ငို နေတတ်တယ်
(မင်း ကို လွမ်းလို့..)

မင်း ဆီမှာ တခါ သာ.. ငါ့ ဆီမှာ တခါ သာတဲ့
တခုသော လမင်းရဲ့ အရှေ့
မတိုင်မပင်.. မရွံ့ မဆုတ်..

ချစ်တယ်.. လို့ ပြိုင်တူပြောဖြစ်ခဲ့တာ
မင်းနဲ့ ငါပဲ မဟုတ်လား ကွယ်...

မင်းက ဂစ်တာ တီးရင်း. ငါ့ကို လွမ်းနေခဲ့ တယ်..
ငါက ကဗျာတွေရေးရင်း.. မင်းကို လွမ်းနေခဲ့တယ်..

မင်းရဲ့ ညတွေ ကို ငါ့အလင်းတွေ နဲ့ ထွေးပွေ့လို့..
ငါ့ ရဲ့ နေ့တွေ ကိုတော့ မင့် သီချင်းတွေ နဲ့ ရင်ခုန်စေခဲ့တယ်..

ဒါနဲ့များ..
ဒါနဲ့များ..

ဒါနဲ့များ... မင်းမို့ ပြောရက်တယ်..
မချစ်ပါနဲ့တော့ကွယ်.. တဲ့...

အဲသလို ရရိုးလား ချစ်သူ ရဲ့...

မင်းကမချစ်ပါနဲ့ ကွယ် ဆိုတိုင်း..
ရပ်ဆိုင်းပစ်လိုက်ရအောင်လို့..
ငါ့ အသဲနှလုံး က ကွန်ပျူတာ တလုံးမှ မဟုတ်တာကို......။

မမသီရိ
၁၈.၂.၂၀၁၀

Friday, March 05, 2010

ကဗျာဆန်သူ

ကဗျာဆန်တယ်ရယ်လို့တော့
ဘယ်ဟုတ်ပါ့မလဲ ကောင်လေးရယ်..

တခါတရံကလေး မှာ
ကာရံတွေညှိပေးရုံကလေးပါ လို့ တွေးကြည့်ပေးပါလား..

ပင်လယ်ကပြောတော့
ကောင်းကင်ပြာလို့ သူ ပြာတာပါတဲ့

ကောင်းကင်ကပြောတော့
တိမ်တွေ ကွာလို့ သူပြာတာပါ တဲ့...

ဒီလိုဆို..
ကျမရင်ထဲက နှလုံးသွေး
အလွမ်းတွေကြောင့်ပြာနေတာ
မင်း... ဘယ်လိုပြောမှာလဲ.......

လေပြေက ပြောတယ်...
မင်းလွမ်းရအောင်လို့ ငါ တိုက်ပေးတာမှ မဟုတ်တာတဲ့..

ပန်းပွင့်လေးကပြောတယ်
မင်း တမ်းတခြင်းအတွက် ငါတို့ ပွင့်ပေးတာမှ မဟုတ်တာတဲ့...

ကောင်လေးရေ..
ကျမ က သူ့ ကို.. လွမ်းချင်လို့ လွမ်းတယ်
လေနုအေး ကြောင့် လွမ်းတယ်.
လေနီ ကြမ်းကြောင့် လွမ်းတယ်..

ပန်းအဖူးတွေ ငုံလို့ လွမ်းတယ်..
ပန်းအပွင့်တွေ စုံတော့လဲ လွမ်းတယ်..

ချစ်ခွင့်ရခြင်း အစုံ နဲ့ သူ့ ကိုချစ်တယ်...
ခြုံပုဝါလေး ခြုံရင် သူ့ ရင်ခွင်လို့ တွေးတယ်..
ပါးပြင်ပေါ် လေဝှေ့အရမ်း.. သူ့ အနမ်း လို့ မှတ်တယ်..
အိပ်မက်ထဲ မှာ .. သူ အလည်လာလို့ ပျော်တယ်..

နှစ်ဦးသား ဆုံမဲ့ ရက် .. လက်ချိုး တွက်ရင်း အသက်ရှင်တယ်

ကဲ... ကောင်လေး ..... မင်း ပြောအုံးမလား...

ကဗျာတွေ ဆန်နေလိုက်တာလို့.......။

မမသီရိ
၂၄.၂.၂၀၁၀

Wednesday, March 03, 2010

ကွဲကွာခြင်း အနုပညာ

တမိသားနဲ့တမိသား အတူတူနေကြဖို့ဆုံးဖြတ်ပြီး ဘ၀ကိုလက်တွဲ လျှောက်ဖို့ အတွက် နောက်ခံသမိုင်းလေးတွေ အမျိုးမျိုး ရှိကြတယ်။ တချို့က တယောက်နဲ့တယောက် နှစ်နှစ်လိုလို မေတ္တာ သက်ဝင်တာမို့ အတူတူ နေဖို့ ဆုံးဖြတ်ကြသလို၊ တချို့ကျတော့ မိဘ မောင်ဘွားတွေရဲ့စီစဉ်မှုကြောင့် ကိုယ်တိုင်သဘောကျသည်ဖြစ်စေ၊ သဘောမကျသည်ဖြစ်စေ အတူတူနေကြဖို့ သဘောတူရတယ်။ တချို့က အခြေအနေ အကြောင်းကြောင်းကြောင့် မေတ္တာ မရှိသော်လည်း အတူတူနေဖြစ်ကြရတယ်။ တချို့ကျပြန်တော့ ရုတ်တရက်မမျှော်လင့်ပဲ အိမ်ထောင်ကျတတ်ကြပြန်ပါတယ်။

ဘယ်လိုပုံစံမျိုးနဲ့ ပဲ အတူတူ နေကြသည်ဖြစ်စေအုံး တော့ ကမ္ဘာပေါ်မှာရှိတဲ့ လက်ထပ်ထားတဲ့ ကြင်ဖော်ကြင်ဖက်တွေဟာ လမ်းခွဲဖို့ ကိုတော့ ဘယ်သူမှ အလွယ်တကူ စဉ်းစားကြမယ် မထင်ပါဘူး..

အိမ်ထောင်ဖက်ရယ်လို့ဖြစ်လာပြီဆိုရင် မိသားစု ဘ၀ ဆိုတာတွေ ရှိလာပြီးတော့ တခြားသော လူမှုရေး၊ စီးပွားရေး နဲ့ စိတ်ပိုင်းဆိုင်ရာ အပြန်အလှန်မှီခိုအားကိုးလိုမှုတွေ၊ ဖေးမ မှုတွေနဲ့ သံယောဇဉ်တွေ နွယ်ဆက်လာပြီမို့ ခွဲခွာကြဖို့ ဆိုတာအတော် ကြိုးစားရမဲ့ အမျိုးပါ..။

အထူးသဖြင့် မြန်မာအမျိုးသမီးတွေဟာ အိမ်ထောင်ပြုပြီးပြီဆို ဆိုးဆိုးကောင်းကောင်း တဘ၀ လုံး နှစ်မြှုပ်ပေးဆပ်တတ်ကြတာမို့ .. အိမ်ထောင်မှု၊ ဘုရားတည်၊ ဆေးမင်ရည်စုတ်ထိုး၊ ဤသုံးမျိုး ချက်မပိုင်လျှင် နောင်ပြင်ရန်ခက်သည့် အမျိုး ရယ်လို့ ရှေးလူကြီးသူမတွေက စာဖွဲ့ခဲ့ကြပါတယ်။

အဲဒါကြောင့်မို့လို့ ထင်ရဲ့နော့။ . အနောက်တိုင်းကလူတွေ လက်မထပ်ပဲ အတူနေ၊ ကလေးမွေးကြတာ၊ အဲဒီအတူနေတဲ့ကာလမှာ စိတ်သဘောထား မတိုက်ဆိုင်တာမျိုး၊ အစေးမကပ်တာမျိုးတွေ ရှိလာရင် အလွယ်တကူ ပြန်ခွာလို့ ရအောင်ထင်ပါရဲ့..။ အဲသလိုမျိုးက မြန်မာပြည်မှာတော့ ရအံ့ မထင်.. တိတ်တိတ်ပုန်းသာ မဟုတ်ခဲ့ရင် မြန်မာ့ဓလေ့ထုံးတမ်း ဥပဒေ အရ ပုဆိုးတန်းတင် ရင် အကြင်လင်မယား ဖြစ်သလိုပဲ၊ ရပ်ကွက်ထဲ ကျေးရွာထဲ အရှေ့ ၇ အိမ်၊ အနောက် ၇ အိမ် က ဒီလူနှစ်ယောက် အတူတူနေကြပြီလို့ သိသွား ရင် အကြင်လင်မယား အရာမြောက်တာမို့လေ..။

ဘယ်လိုပဲ ဖြစ်ဖြစ် လောကကြိးရဲ့ အရင်းနှီးဆုံး လူသား နှစ်ယောက်ဟာ နှဖူးစာ မင်ရည်ကျဲလာတဲ့ တနေ့၊ တယောက်အပေါ် တယောက် အကြောင်းအမျိုးကြောင့် စိတ်ကုန်လာတဲ့ တနေ့၊ ဘယ်လိုမှ အတူတူနေကြဖို့ မဖြစ်တော့ဘူးလို့ နှစ်ယောက်လုံးက ယူဆလာတဲ့ နေ့မှာတော့ မြန်မာပြည်မှာ ဖြစ်ဖြစ်၊ တခြား ကမ္ဘာပေါ်က ဘယ်နေရာမှာ ဖြစ်ဖြစ် ကွာရှင်းမှုတွေ ကွဲကွာမှုတွေ ဖြစ်လာရပါတော့တယ်။

တချို့တွေက အဲဒီ ခွဲခွာခြင်းကို အလွယ်တကူပဲ ဖြတ်ကျော်ကြပေမဲ့၊ တချို့ကျတော့လဲ ခက်ခက်ခဲခဲ ကျော်လွှားကြရတယ်။ ဆုံးဖြစ်ချက်တွေချ ဖို့ အချိန်တွေ နှစ်ချီပြီးစောင့်စား ကြသလို တချို့ကျတော့လဲ တထိုင်တည်း၊ တချက်ထဲ ရဲရဲဝံ့ဝံ့ ကွာပစ်လိုက်ကြတာမျိုး..။

ဘာရယ်လို့တော့ မဟုတ်ပါဘူး.. ။ ပြီးခဲ့တဲ့ နှစ်ထဲမှာ လက်ထပ်ခြင်း အနုပညာ ဆိုတဲ့ ပို့စ်လေးတခု တင်ထားဖူးတာမို့.. ခု တခါ တော့ ဖော်ဝါ့ဒ်မေးလ် ထဲ က ရလာတဲ့ ကမ္ဘာ့နေရာ တချို့က စုံတွဲတွေ ရဲ့ ခွဲခွာပုံ နည်းလမ်းလေးတွေ ပြန်လည်ဝေမျှ လိုက်ပါတယ်...။

ကမ္ဘာပေါ်က ချစ်သူစုံ တွဲတိုင်းဘယ်သူ့ကိုမှ နာကျင်စွာ မခွဲခွာစေချင်ပါဘူး..။

ဂျပန်

အိပ်နေတဲ့မိန်းမရဲ့ပုံစံကိုမကြိုက်ခဲ့ရင် ယောက်ျားကကွာရှင်းခွင့်တောင်းနိုင်တယ်။

*အီတလီ*

မိန်းမက အိမ်မှုကိစ္စမလုပ်ဘူး၊ မလုပ်ချင်ဘူးဆိုရင် ယောက်ျားကကွာရှင်းခွင့်တောင်းနိုင်တယ်။

*အာဖဂန်နစ္စတန်*

တကယ်လို့ မိန်းမဖက်က အရင်ကွာရှင်းခွင့်တောင်းပြီးနောက်အိမ်ထောင်ထပ်ပြုခဲ့ရင်နောက်ယောက်ျားက

အရင်ယောက်က်ျားကို မင်္ဂလာစရိတ်နှစ်ဆလျော်ရတယ်။ တကယ်လို့ ယောက်ျားဖက်က

အရင်ကွာရှင်းခွင့် တောင်းခဲ့ရင်မိန်းမနောက်အိမ်ထောင်ပြုတဲ့အခါ နောက်ယောက်ျားက

အရင်ယောက်ျားနဲ့ မိန်းမတို့ဆောင်ခဲ့တဲ့ မင်္ဂလာစရိတ်ကို ပေးလျော်ရပါတယ်။

*အင်္ဂလန်*

ယောက်ျား သို့မဟုတ် မိန်းမ တစ်ယောက်ယောက်ကကွာရှင်းခွင့်တောင်းနိုင်တယ်။ တကယ်လို့နှစ်ဦး

လုံးပြိုင်တူကွာရှင်းခွင့်တောင်းခဲ့ ရင် အတည်မပြုဘူး။

*လက်ဘနွန်*

မိသားစုရိုးရာမှာ မိန်းမဖြစ်သူက အပြင်မထွက်ခင် လင်ယောက်ျားရဲ့ သဘောတူညီချက်ကိုယူရတယ်။ တကယ်လို့ တစ်နေ့မှာ ယောက်ျားက မိန်းမကိုမလိုချင်တော့တဲ့အခါအပြင်ထွက်မယ်လို့ မိန်းမခွင့်လာတောင်းတဲ့အချိန် "သွား.. အိမ်ပြန်မလာနဲ့တော့" လို့ပြောပြီး ကွာရှင်းလို့ရပြီဖြစ်တယ်။

*Togolese Republic*

ယောက်ျားနဲ့မိန်းမ မချစ်မနှစ်သက်ကြတော့တဲ့အခါ သက်ဆိုင်ရာရုံးကိုသွားပြီးကွာရှင်းခွင့် တောင်းနိုင်တယ်။ တာဝန်ရှိသူတွေက သူတို့နှစ်ယောက်ရဲ့ဆံပင်ကိုတစ်ဝက်စီဖြတ်ပြီး အချင်းချင်းလှဲလှယ်ခိုင်းကြတယ်။

*Salvador*

ယောက်ျားနဲ့မိန်းမ မချစ်မနှစ်သက်ကြတော့တဲ့အခါ သက်ဆိုင်ရာရုံးကိုသွားပြီးကွာရှင်းခွင့် တောင်းနိုင်တယ်။ ပြီးတော့ နွားတစ်ကောင်ဝယ် သတ်ဖြတ်ပြီးနှစ်ဖက်မိဘဆွေမျိုး၊ မောင်နှမတွေခေါ်ပြီး စားသောက်ရတယ်။ စားသောက်ပြီးရင်ယောက်ျားနဲ့ မိန်းမ မျက်နှာချင်းဆိုင်ပြီး တစ်ယောက်ကိုပါး(၁ဝ) ချက်စီရိုက်ရတယ်။ပါးရိုက်ရတာက နောက်ဆုံးနာကျင်ခြင်းကို မှတ်ယူစေဖို ဖြစ်ပြီး ရိုက်ပြီးရင်ကွာရှင်းခွင့်ရပြီဖြစ်တယ်။

*Ecuador*

လင်မယားနှစ်ယောက်ကွာရှင်းချင်ရင်(၃)ရက်အစာငတ်ခံရတယ်။ အစာငတ်ခံပြီး (၄) ရက်မြောက်မှာဒေသခံအသက်ကြီး သူတစ်ယောက်ဆီသွားပြီး

အင်အားရှိမရှိအစစ်ဆေးခံရတယ်။ တကယ်လို့ အားမရှိတာမှန်ရင် ကွာရှင်းခွင့်ပေးတယ်။

လိမ်ညာနေတယ်ဆိုရင်တော့ လုံးဝ တစ်သက်လုံး ကွာရှင်းခွင့်မပေးတော့ဘူး။

(စာဖတ်သူတွေ သိနေတဲ့ နီုင်ငံတကာက ကွာရှင်းခြင်း ပုံစံလေးတွေ လဲ ရေးပေးခဲ့ကြပါအုံး..)

အာလုံးကို ချစ်ခင်လေးစားတဲ့

မမသီရိ

Wednesday, February 24, 2010

သူ.. နဲ့... သူမ

သူမ

တခါဖြင့်ရင်လဲ တခါတည်းမဟုတ်..
အကြိမ်ကြိမ် အခါခါ လူးလာခေါက်တုန့်
အလွမ်း နွံအိုင်ထဲ ..မမော မပမ်း ကူးခပ်..
အဲဒါ... သူမ.. ပေါ့..

မယ်မယ်ရရ အကြောင်းပြစရာမရှိ
ချစ်မိ လို့ ချစ်သွားသတဲ့
သူမ ပြောခဲ့.. သူ့ ကိုချစ်တဲ့ အကြောင်းတွေ...

သူမ ကောင်းကင်တခွင်လုံး..
သူ့ကို ချစ်ခြင်းတွနဲ့ ဖုံးအုပ်..
သူမ ချစ်တာ.. သူ့ အမည် စာလုံ့းပေါင်းလေးတွေက အစပါ.. တဲ့..

သူ့မျက်နှာ ငွေလ
တနေ့တခါ မမြင်ရ .. နွမ်းလျ လို့ပမ်း
မရွှင်လန်းနိုင်အောင် လွှမ်းမိုး
အလွမ်းတာရိုးတွေ ကျိုး
မျက်ရည်မိုးတွေ စွေခါစွေ....
ကြာလေ ချစ်လေ.. ချစ်လေ.. လွမ်းလေ..
လွမ်းလေ ချစ်လေ....ချစ်နေမိတာ သူ့ ကိုပါ တဲ့....

သူ

တရာသီဖြင့်ရင်လဲ တရာသီ မဟုတ်..
သက္ကရာဇ်တွေထဲ စုန်းစုန်းမြှုပ်လို့
အလွမ်းတွေ မြုံထား..
အချစ်လို့ ထင်ခဲ့တဲ့ အရာများ
လိုလိုချင်ချင် တပ်မက်ဖူးသော သူ့ နှလုံးသား..
ဓား ပါးပါး တွေ နဲ့
တလွှာချင်း လွှာခံရပြီး တဲ့ နောက်မတော့...

အနာဂတ်ကို လျှောက်ဖို့ ကြိုးစားရင်း..
အတိတ်ပန်းခင်းထဲမှာ ပဲ ညှို့ချက်မိ..
လှောင်ပိတ်ခံ ထိနေသော..

ပန်းဝတ်မှုန်တွေ ဖမ်းဆုပ်ယူရန်ကြိုးစားရင်း
ပျားဆိပ်ဒဏ် အဖန်ဖန် သင့်ခံ ထိနေသော

လေထဲစီးမျောနေတဲ့ သီးချင်းသံ သဲ့သဲ့ နောက်
တကောက်ကောက် လိုက်ရင်း အမောသင့်နေရရှာသော...

ဟိုတစ ဒီတစ.. ပြန့်ကျဲ လွင့်စင်ကျသွားသော
မှန်ကွဲ အစတွေ တယုတယ ပြန်ကောက်
ကောင်းလာလေနိုး ကြိုးစားဆက်ရင်း.. မှန်ကွဲစ ရှခံထိနေသော...

ဒြပ် အကောင်အထည် ရှိနေပါရက်..
ပြန် ပြန် စမ်း ကြည့်တဲ့ အခိုက်
တိုက်မိ စရာ အရိပ်တောင် မရှိတော့တဲ့ နောက်
ပျောက် ပျောက် သွား လုပြီ ဖြစ်နေ သော.....

ကောင်းကင်ပြာပြာ ကိုမော့ ကြည့်ရင်း
သမုဒ္ဒရာ အမှတ်နဲ့ တိမ်တွေအကြား..
အိပ်မက်ကို ကျောပိုးလို့ လက်ပစ်ကူး သွားနေသော.....
သူမ ... အသက်တမျှ.. ချစ်ရသော... သူ......

သူ နဲ့ သူမ

သွေးတစက်စက် ကျနေတဲ့ သူ့ ဒဏ်ရာတွေ အတွက်
သူမ နှလုံးသားဟာ မွမွ ကျေခဲ့....
ဟက်တက် ကွဲ ကာ ရိနေပြီ ဖြစ်တဲ့ သူ့ ဒဏ်ရာတွေအတွက်
သူမ... အသက်နဲ့ လဲ လို့ ကုပေးခဲ့ချင်သတဲ့..

သူမရဲ့ သွေးတွေ ဆေး အဖြစ် ဖန်ဆင်း..
သူ့ အနာ မယင်းအောင် ကာကွယ် ခဲ့ ချင် သတဲ့...

သူ ပျော်ရွှင်ဖို့.
သူ စိတ်ချမ်းသာ ဖို့..
သူ အဆင်ပြေဖို့..
သူ.. သာ.. ပြန်လည် ရှင်သန်လာမယ် ဆို..
ဘာကိုပေးရရ
ဘာကို လုပ်ရရ
ဘာတွေပဲ ဖြစ်ဖြစ်
အချစ်တွေ နဲ့ သူမ.. ပေးဆပ်လို့ရသမျှ ပေးဆပ်ချင်သေး သတဲ့..

အိပ်မက်ထဲတွေ တောင် ယောင်ပြီးတော့ချစ်..
အဲဒီ အဖြစ်တွေ အကြောင်း.. သူ့ ကို ပြန်ပြောင်းပြောတဲ့အခါ
အိပ်မက်တွေ ခဏခဏ မမက်ပါနဲ့ လုံမ ရယ်. လို့.
သူ က ပြော အုံးမှာ ဖြစ်ပေမဲ့...

အလွမ်းဒဏ်သင့် ကဗျာတွေ.. အပုဒ်ရေ များလာပြီ ဆိုမှဖြင့်
အဲဒီ အလွမ်း ကဗျာ တွေ ခဏခဏ မရေး ပါနဲ့ လုံမ ရယ်. လို့
သူက ပြောအုံးမှာ ဖြစ်ပေမဲ့...

သူ သွား ရာ လမ်းတလျှောက်..
သူ့ ကျကျန်နေခဲ့တဲ့ အလွမ်း အစက် အပျောက် တွေ
တစ စီ တစက်စီ နောက်ကကောက်...
သံ ယောဇဉ် ကျည်တောက်ထဲ စု..
သူ့ ဒဏ်ရာတွေ ပျောက်တဲ့ အထိ .. နောက်ဆုံး ထွက်သက် ရှိချင် ရှိစေ..
သူမ ... စောင့် နေမှာ....တဲ့...

သူ ငိုဖူး တဲ့ သစ်ပင်အောက်..
ကျကျန်နေတဲ့ သူ့ မျက်ရည်တွေ
တစစီ တပွင့်စီ နောက်ကကောက်..
အကြင်နာ ကျည်တောက်လေးထဲ ထည့်
သူ့ မျက်ဝန်းတွေ ပြန်လည်တောက်ပမဲ့နေ့
အသက် ရှိသရွေ့ သူမ စောင့်နေမှာ....တဲံ့....

ဘလက်ခ် ဟိုးလ်.. တွင်းနက်ထဲ ပြုတ်ကျ...
ပျောက်ဆုံး သွားရတဲ့ သူ့ အပြုံးတွေ...
အသက်ပြန်ဝင်လေနိုး.. မျှော်ကိုး တွေးစိတ်တွေ နဲ့..
ရင်ဖိုစွာ မန်းမှုတ်.. လက်အုပ်လေး ချီ ဆုတောင်းရင်း...
ဘ၀ ကူး ခြင်းဆိုတာ မရှိသရွေ့.... သူမ.. စောင့်နေမှာ တဲ့.....

တကယ်တော့..
သူမ... ဟာ.... အချစ်ဆိုတာ.... သူ နဲ့ တွေ့ မှ .. သိတာပါ ... တဲ့....

တကယ်တော့..
သူမ... ဟာ.... အချစ်ဆိုတာ.... သူ နဲ့ တွေ့ မှ .. သိတာပါ ... တဲ့.....။

မမသီရိ
၅.၉.၂၀၀၉

Monday, February 22, 2010

သူ.. သူမ .. တို့နှင့် ပတ်သက် ၍......

တလောက ညီမလေး တယောက်က ပြောလာတယ်.. မမ က ကဗျာတွေ ရေး ရေး နိုင်လွန်းလိုက်တာတဲ့...။ သူ ပြောမှ သေချာ ပြန်ကြည့်မိတယ်.. ဟုတ်ပါ့... ဘလော့ရဲ့ တရားဝင် သက်တမ်းတနှစ် မပြည့်တပြည့်မှာ.. ရေးဖြစ်ခဲ့တဲံ့၊ တင်ဖြစ်ခဲ့တဲ့ ကဗျာတွေ.. ၉၉ ပုဒ် ရှိခဲ့ပြီ.... နောက် တပုဒ် က ပုဒ်ရေ ၁၀၀ မြောက် ကဗျာ ဖြစ်တော့မှာ...။ မမသီရိ ဘလော့လေးကို ဘလော့ဂိုစဖီးယားထဲတရားဝင်လွှတ်ပေးခဲ့တာ လွန်ခဲ့တဲ့နှစ် ဇန်န၀ါရီ ၁၀ ရက်နေ့ကမို့လို့ ခုဆို တနှစ်သက်တမ်းရှိခဲ့ပြီလို့ပြောရတော့မှာပေါ့။ အဲဒီမတိုင်ခင်ကတော့ အမှတ်တရသိမ်းထားခဲံရုံလေးပါပဲ။

ကျမ ကဗျာတွေရေးခဲ့တာ.. အလယ်တန်း တက်စ နှစ်တွေမှာ ဖြစ်မယ် ထင်ပါရဲ့..။ ကျမတို့ ငယ်ငယ် တုန်းက ပန်းချီ ဆန်းထွန်း ဆွဲတဲံ့ ပို့စ်ကဒ်လေးတွေ အတော်ခေတ်စား ခဲ့တာကလား.. မောင်ပန်းမွှေး ရဲ့ သုံးကြောင်းစပ် ကဗျာလေးတွေ ပါတဲ့ ဆန်းထွန်း ရဲ့ချစ်စရာ အရုပ်လေးတွေနဲ့ ပို့စ်ကဒ်လေးတွေ က ကျမရဲ့ အသဲ စွဲ ဖြစ်ခဲ့ ပြီး ရသမျှ မုန့်ဖိုးတွေ နဲ့ ပုံအသစ်တွေ့တိုင်း ၀ယ် သိမ်းခဲ့ဖူး ခဲ့တယ်လေ..။ ကိုယ် က ပုံ ဆွဲတာလဲ ၀ါသနာက ပါခဲ့သေးတာ ကိုး..။ အဲဒီ ပို့စ်ကဒ်တွေထဲက သုံးကြောင်းစပ်ကဗျာလေးတွေနဲ့ ကျောင်းသင်ရိုးညွှန်းတမ်းထဲ ကခေတ်စမ်းကဗျာတွေ က ကျမကို ကဗျာ စမ်းရေးဖြစ်စေဖို့ တွန်းအားပေးခဲ့တာ ဖြစ်နိုင်ပါတယ်.။ ကျမရဲ့ ကဗျာရေးခဲ့တဲ့ ရာဇ၀င် အကြောင်းတွေကိုတော့ ကိုတင်မင်းထက် Tag လို့ရေးဖြစ်ခဲ့တဲ့ ပထမ ကဗျာ ဆိုတဲ့ပို့စ်ထဲမှာလဲ အတော်ကလေး ထဲထဲဝင်ဝင် ရေးထားခဲ့ပါသေးတယ် ..။

ကျမရဲ့ကဗျာအများစုက ကျမရဲ့ ပုဂ္ဂလိက ကိုယ်ပိုင်ခံစားချက်လေးကို အမြဲဦးစားပေးထားတဲ့ အတ္တဥခွံဘောင်ကျဉ်းကျဉ်းလေးထဲမှာပဲ ရှိနေတဲ့ သမုဒယ ကဗျာတွေများပါတယ်။

ခံစားလွယ်တတ်သူ၊ ခံစားချက်တွေ ကူးစက်လွယ်သူ တယောက်မို့လို့လဲ ပတ်ဝန်းကျင်မှာ မြင်ရတွေ့ရ၊ ကြားရ၊ သိရ တဲ့ အတွေ့အကြုံတွေထဲက လှိုက်မောဖွယ်ရာ၊ ကြည်နူးဖွယ်ရာ၊ လွမ်းဆွတ်ဖွယ်ရာ အကြောင်းအရာတွေဟာ ကျမ ရဲ့ ရင်ကိုအမြဲ လာလှုပ်ခတ်စေခဲ့ပါတယ်။

ဒီလိုနဲ့ ဒီဘလော့ လေး ရေးနေရင်းမှာပဲ ကျမရင်ထဲမှာ ဇာတ်ကောင် နှစ်ယောက် က ပုံပေါ် အသက် ၀င် လာခဲ့တယ်..

အဲဒီနှစ်ယောက်ကတော့ ကျမရဲ့.. သူ နဲ့ သူမ.. ပဲပေါ့..

ကျမရဲ့ကဗျာတွေထဲက သူမ.. ဟာ ချစ်သူ ကို အချစ်ကြီးတတ်တဲ့၊ နားလည်စာနာပေးတတ်တဲ့၊ အင်မတန်မှ လွမ်းတတ်တဲ့ မိန်းမငယ်တယောက် ဖြစ်နေခဲ့ပြီး.. သူမ ရဲ့ သူ ကတော့ .. တွေဝေတတ်သူ၊ အားငယ်တတ်သူ၊ တပြိုငိနက်ထဲမှာပဲ ပြတ်သားချင်သူ သတ္တိရှိလွန်းသူ၊ သူမနဲ့ အဝေးကြီး တနေရာမှာ ရှိနေတဲ့သူ၊ အနုပညာဆန်လွန်းလှပြီး နှလုံးသားနုးညံ့လွန်းတဲ့သူ၊ ဂီတ ကို မြတ်နိုး ဖန်တီးတတ်သူ၊ သူမ နဲ့ တွေ့တဲ့ ခါ သူမအတွက် အပျော်ရွှင်ဆုံး အချိန်ကာလတွေ ပေးနိုင်မဲ့သူ လို့ သူမ ကိုယ်တိုင်က ယုံကြည်ကိုးစားနေတဲ့.. သူ.. ပဲပေါ့.. သူ.. ဟာ.. ကျမရဲ့ ကဗျာတွေထဲ မှာ.. တခါ တရံ .. ကို.. ဖြစ်ခါ ဖြစ်.. တခါ တရံမှာတော့.. မောင်.. ဖြစ်ခါ ဖြစ်... တခါ တခါ ကျတော့လဲ.. ကလေးလေး တယောက် ဖြစ်လို့..

ကျမ ကိုယ်တိုင်.. အဲဒီ သူ နဲ့ သူမ ဟာ ဒီကမ္ဘာပေါ်မှာ တကယ်ရှိရဲ့လား လို့ မသေချာပါဘူး၊ စိတ်ကူးထဲမှာ တော့ အဲဒီ ၀ိဥာဉ်၂ ခုဟာ ကျမကို အမြဲ လွှမ်းမိုးနေတတ်ပါတယ်..တခါ တရံမှာသူ့ ရဲ့ ၀ိဥာဉ်တွေလာဝင်ပူး ချင် ပူးတတ်သလိုပဲ အခါ အများစု မှာတော့ သူမ ရဲ့ ၀ိဥာဉ်တွေက တွယ်ကပ်တာ ကိုခံရပါတယ်.... ။

အဲဒီ မသေချာတဲ့ ကြားမှာပဲ .. သူ. သူမ တို့ နဲ့ ပတ်သက်လို့ ခံစား ခဲ့ရတာတွေ ကို ချရေးဖြစ်တဲ့ ကဗျာ ၅၃ ပုဒ် ကြီးများ တောင် ရှိနေခဲ့ပါပေါ့လား...

၁။ အပြစ်တစ်ခု လို့ မမှတ်စေချင်
၂။ ချစ်သူ့ ရင်ခွင်
၃။ တိတ်တိတ်လေးပဲ.လွမ်းနေမယ်..
၎။ ဆူး
၅။ ချစ်မိသည့် ..ဒဏ်...
၆။မောင်မလာပါ ဘူးကွယ်
၇။ အချိန်တိုင်းမှာ...
၈။ ချစ်လွန်းကြင်
၉။ ယုံကြည်ချက်
၁၀။ ဂလိုက်ဒါလေး တစ်စီးရဲ့အကြောင်း
၁၁။ ;(
၁၂။ ပျော်လိုက်တာ
၁၃။ အချစ်ကြောင့်သာ...
၁၄။ ချစ်သူ
၁၅။ ရှင်သန်ခြင်း
၁၆။ ငါ့ရဲ့ ကဗျာဆရာလေး
၁၇။ မောင်ဟာ အကုန်လုံးပဲ
၁၈။ ကော်ဖီကြိုက်တဲ့သူ
၁၉။ အလွမ်းပန်းတွေ စမ်းမျက်ရည်
၂၀။ အလွမ်းသူဌေး
၂၁။ ပေးပို့ချင်သော အနမ်းများ
၂၂။ ကန္တာရ သစ်ပင်
၂၃။ ခွင့်လွှတ်ပါ
၂၄။ အိပ်မက် မိုးတိမ်
၂၅။ ဘန်ကီမွန်လဲ စိတ်တိုတယ်.. ချစ်သူကိုလဲ စိတ်တိုတယ်
၂၆။ ကျမလာခဲ့တယ်
၂၇။ မင်းမရှိရင်
၂၈။ ခံပွင့်ကလေး
၂၉။ အဖြေညှိစရာမလိုတဲ့ ပဟေဠိလေးတွေ
၃၀။ ပါရမီဖြည့်လိုသူ၏ဆန္ဒများ
၃၁။ မင်းရဲ့အရုပ်ကလေး
၃၂။ ရူးသွပ်ခြင်း
၃၃။ ၀ိုင်နီပုလင်းလေး တလုံး...
၃၄။ နောင်တမဲ့သော... (၂)
၃၅။ ပုလဲပျောက်ရှာပုံတော်
၃၆။ "သူသိစေချင်"
၃၇။ ချစ်ခြင်းအားဖြင့်
၃၈။ ချစ်သူ့ကျိန်စာ
၃၉။ မျက်ပြေ ကဗျာ
၄၀။ အရိုးခံ ဆန္ဒမွန်
၄၁။ သစ္စာ
၄၂။ ပျားကလေး တမန်
၄၃။ ငါက ကျန်စစ်သား မဟုတ်ဖူး
၄၄။ မိဆိုး
၄၅။ တိမ်ကိုနမ်းသော ခြေလှမ်းများ
၄၆။ အလွမ်းတို့စေရာ
၄၇။ ဥယျာဉ်မှူးနဲ့သူ၏ပန်း
၄၈။ နှစ်ဦးသား ဆုံတဲ့နေ့
၄၉။ မင်း မရှိတဲ့ အရပ် မှာ....
၅၀။ ပိုင်စိုး ပိုင်နင်း
၅၁။ ချစ်တယ်.... ချစ်တယ်... ချစ်တယ်...
၅၂။ ပုထုဇဉ်
၅၃။ သဲစုတို့ထက်ပိုသော ... ကြယ်စုတို့ထက်ပိုသော.....

ပြန်စဉ်းစားကြည့်လိုက်မိတော့ အတော့ ကို အံ့သြ ထူးဆန်းဖွယ်ရာပါပဲ.. အဲဒီ ကဗျာတွေ က ဘယ်လိုများ ဒီလောက်ထိ အလွယ်တကူ စီဆင်းပြီး ရေးဖြစ်ခဲ့တာပါလဲ လို့ ပေါ့..။

ဘာပဲ ဖြစ်ဖြစ် အဲဒီ သူ နဲ့ သူ မ ကြောင့်ပဲ ကျမ ရဲ့ ဘလော့ လေး အသက်ဝင် ရှင်သန်ခဲ့တယ်။ မိတ်ဆွေ တွေ တိုးလာခဲ့တယ်..။ ခံစားချက် တူညီ ပြီး အလွမ်းကူးဖော်တွေ ရခဲ့တယ်..။

ဒါကြောင့်မို့လို့ ကျမ ရဲ့ သူ နဲ့ သူမ ကို ဂုဏ်ပြု မှတ်တမ်းတင်ဖို့ စိတ်ကူးလေး ရလာခဲ့ ရင်း.. သက်ဆိုင်တဲ့ ကဗျာတွေ စားရင်းပြုစုဖြစ်ခဲ့တယ်... ပြီးတော့ .. ကျမရဲ့ ဘလော့ပေါ်မှာ အပုဒ်ရေ ၁၀၀ မြောက် ကဗျာ အဖြစ်နဲ့ တင်ပေးဖို့ ... သူ နဲ့ သူမ .. ဆိုတဲ့ ကဗျာလေး တပုဒ်ကိုလဲ ကျမ ရေးဖြစ်ခဲ့ပါတယ်... ။

အဲဒီ ကဗျာ ကို တော့.. ဒီဘလော့ လေးရဲ့ နှစ်ပတ်လည် ဂုဏ်ပြု တဲ့ အနေနဲ့ နောက် ၃ ရက် အကြာ တင်ပေးပါ့မယ်...။

အကယ်လို့များ.. ကျမ ရဲ့ ကဗျာတွေ ထဲက သူမ နဲ့ သူ ဆိုတာ.. ဒီလောက ကြီးမှာ အမှန် တကယ် ရှိနေခဲ့ တယ်လို့ ဆိုရင်.. ကျမ ရဲ့ ဘလော့ မိတ်ဆွေ တွေ... သူတို့ နှစ်ယောက် ကို ဘယ်လို ဖြစ်စေချင်တာလဲ လို့ တော့.. ကျမ သိနေချင်မိပါတယ်.... နောက် ၃ ရက် အကြာ မှာ တင်မဲ့ ကဗျာလေး ကို ဖတ်ပြီးတဲ့ ခါပြောပြချင်တဲ့ ဆန္ဒ ရှိကြမယ်ဆို ရင် ပြောပြ ပေးခဲ့ ကြပါ.....။

မမသီရိ

(ဒီပို့စ်ကိုစထားခဲ့တာ ၂၀၀၉ နိုဝင်ဘာ ၈ ရက်နေ့ ထဲက ဆိုတော့ အတော်ကြာနေခဲ့ပြီပေါ့..။ ဒီဘလော့လေး ရဲ့ တရားဝင်နှစ်ပတ်လည်နေ့ ဖြစ်တဲ့ ၂၀၁၀ ဇန်န၀ါရီ ၁၀ ရက်နေ့ မှာ ကဗျာ ပုဒ်ရေ ၁၀၀ မြောက် မတင်မီ ရှင်းတမ်းလေး အနေနဲ့ တင်ဖို့ ရေးခဲ့တာ.။ အလုပ်တွေ မနိုင်ရင်ကန် နဲ့ မို့ ခု မှ ပဲ တင်ရပါတော့တယ်..။)

Friday, February 19, 2010

တတိယမြောက် နှစ်ကူးည

မွေးတာကမြို့ပေါ်မှာ ကြီးတော့ ဖေဖေတာဝန်ကျတဲ့ မိခင်ဖက်ကအဖိုးတွေအဖွားတွေ ရှိတဲ့နယ်မှာ၊ အနောက်တိုင်းယဉ်ကျေးမှုနဲ့ မနီးစပ်တဲ့အပြင် ခရစ်နှစ်သစ်ကူးကို တကူးတက အလေးမထားတဲ့ ပတ်ဝန်း ကျင်မှာ ကြီးပြင်းခဲ့ရသူမို့ ဒီဇင်ဘာ နှစ်ကူးညတွေကို ရင်ခုန်ရကောင်းမှန်း မသိခဲ့တဲ့ သူပါ။

၂၀၁၀ အကြို နှစ်ကူးည ရဲ့ ည ဦး ၁၁ နာရီ ခွဲလောက်ထိ သဲအညိုနုရောင်တွေ လွှမ်းတဲံ့ ကမ်းခြေ ဟိုတယ် တခု ရဲ့ အခန်းကျယ် တခု ထဲမှာ လုပ်ဖော်ကိုင်ဖက်တွေ ကို အဖော်ပြုရင်း ကွန်ပျူတာတလုံးနဲ့ အလုပ်ရှုပ်နေခဲ့ရတဲ့ ကုသိုလ်ကံ ရုပ်ဆိုးဆိုးကြောင့် အလုပ်ခပ်များများ မိန်းမ တယောက်ဟာ ကျမ ပဲပေါ့။

ဟိုတယ်ရဲ့ ကပွဲ ခန်းမဆီက ရီမောသံတွေ သီချင်းဆိုသံ၊ ကခုန်မြူးတူးသံတွေက အခန်းထဲဆီကို တချက် တချက် လွင့်ပျံ တက်လာနေပေမဲံ့၊ ၂၀၁၀ မကူးခင် အပြီးသပ်ရမဲ့အလုပ်တွေကို ဦးစားပေးနေရတာမို့ အဖွဲခေါင်းဆောင်ဖြစ်နေတဲ့ ကျမက ခေါင်းဆောင်ပြီး ခေါင်းမထောင်ရဲ၊ ကိုယ်သာ အရင်ဖင်ကြွ လိုက်လို့ကတော့ အလုပ်ကပြီးဖွယ်ရာ မမြင်တာမို့ တနေကုန်ပင်ပမ်းထားတာတောင် ကြိတ်မှိတ် ဆက်လုပ်နေခဲ့ရတာမျိုး.. ။

၁၁ နာရီ ခွဲမတော့ လက်ပ်တော့ကို ပိတ်ချ လိုက်ပြီး အခန်းဖော်ညီမငယ် နဲ့ အပြင် ထွက်ခဲ့ကြတယ်.. ကပွဲ ခန်းမနေရာကိုလှမ်းကြည့်လိုက်တော့ ပျော်နေကြသူတွေချည်း..။ ကိုယ်နဲ့ မျက်နှာသိတွေလဲ မရှိတာမို့ ၀င် ပျော်ကြဖို့က ခပ်ကြောင်ကြောင် ဖြစ်နေမှာမို့ နှစ်ယောက်သား ကမ်းခြေဖက်ကို ခြေဦးလှည့်ဖို့ ဆုံးဖြတ်ကြရင်း.. မီးမှိန်မှိန်လင်းနေတဲ့ ဟိုတယ်ရှေ့ဖက်ဆီ တိုးဝင်လျှောက်ဖြစ်ခဲ့ကြပါတယ်.. ။

(၂)

"နှစ်သစ်ကူးချိန် ကိုခုလိုစောင့်ကြည့်ဖြစ်တာ မမ ဘ၀ မှာ ဒါဟာ တတိယအကြိမ်မြောက်ပဲ ညီမ ရဲ့.."

အညိုနုနု သဲမွမွ ကမ်းခြေပေါ်မှာ ထိုင်ချလိုက်ရင်း ပြောလိုက်တဲ့ သူ့စကားသံကြောင့် ဘေးက အခန်းဖော် ညီမငယ်က သူမ မျက်နှာကို တအံ့ တသြ လှမ်းကြည့်လာပါတယ်..။ ဟုတ်ရဲ့လား လို့ မယုံချင်စွာ စူးစမ်းတဲ့သူမလေးရဲ့ မျက်ဝန်းတွေကို လပြည့်ည လရောင်အောက်မှာ ကျမ တွေ့ဖြစ်အောင်တွေ့လိုက်မိတယ်..

"၂၀၀၀ ပြည့်နှစ် နှစ်ကူးတဲ့အချိန်တုန်းက ဘ၀ရဲ့ ပထမ ဦးဆုံး နှစ်ကူးည ဖြစ်ခဲ့တာပေါ့..အဲဒီတုန်းက မမ တာဝန်ကျခဲ့ မြို့လေးရဲ့ Inter Agency Happy New Year Party ကို ခုလောလောဆယ် စင်္ကာပူကျန်းမာရေးဝန်ကြီးဌာနမှာ တာဝန်ထမ်းဆောင်နေတဲ့ လုပ်ဖော်ကိုင်ဖက် မိတ်ဆွေ မောင်ငယ်လေး တယောက်နဲ့ သူ့သူငယ်ချင်းတွေ ဦးစီးပြီး မမ တို့တွေက ၀ိုင်းဝန်းကူညီပေးခဲ့ရတယ်.. လိုတဲ့ ရန်ပုံငွေကိုတော့ အဲဒီတုန်းက နိုင်ငံတကာ ၀န်ထမ်းတွေက အများစု ကျခံပေးကြတယ်လေ.. ပျော်စရာတော့ အကောင်းသား ကွဲ့.. အစားအသောက်တွေ.. အဖွဲ့အစည်းအသီးသီး ရဲ့ လုပ်ငန်းပြကွက်တွေ၊ ရီစရာဖက်ရှင်ရှိုး၊ လှယဉ်ကျေးမောင် ပြိုင်ပွဲ၊ စတေ့ရှိုး၊ မီနီေ၈ါ့ဖ်.. အို.. စုံနေတာပဲ.. အဲဒီတုန်းက အဲဒီမြို့သေးသေးလေးမှာ အဖွဲ့ ပေါင်း ၁၀ ကျော် ၂၀ နီးပါး ရှိနေတာဆိုတော့ ၀န်ထမ်းတွေလဲ အများကြီးပေါ့..... ၂၁ ရာစုရဲ့ နှစ်သစ်ကို ကြိုဆိုတဲ့ နှစ်ဟောင်းရဲ့ နောက်ဆုံး စက္ကန့်ပိုင်းလေးကို တော့ ဖယောင်းတိုင်လေးတွေ ကိုယ်စီ ကိုင်ရင်း နှင်းမှုန်ဖွဲဖွဲအောက်မှာ လူတွေအများကြီးနဲ့ ထောင်စုနှစ်သစ်ကို ကြိုခဲ့တာလေ.."

"ဒုတိယ အကြိမ် နှစ်သစ်ကူးကတော့ လွန်ခဲ့တဲ့ ၂ နှစ်က၊ ရုံးက ညွှန်ကြားချက်နဲ့ မမ ဦးဆောင်ပြီး လုပ်ခဲ့ရတာ..။ နှစ်သစ်ကူး ကို Peace Mobilization Objective နဲ့ဒေသတွင်းမှာရှိတဲ့ လူမျိုးစုတွေအကြား Inter Ethnic Activity ပုံစံမျိုးဖြစ်အောင် လုပ်ပေးခဲ့ရတာ.လေ.။ နှစ်သစ်ကို အကြောင်းပြုပြီး လူမျိုးစုတွေ အကြားအချင်းချင်းနားလည်မှုတည်ဆောက်ဖို့၊ ငြိမ်းချမ်းရေး သဘောတရားတွေ အခြေခိုင်ဖို့ ရည်ရွယ်ချက်ကို အကောင်အထည်ဖော်ပေးခဲ့ရတာ.ပေါ့..။ Happy New Year လို့ ကိုယ်တိုင် မိုက် ကိုင် ဦးဆောင် အော်ခဲ့တာပေမဲံ့ တာဝန်တွေနဲ့ ပျော်စရာရယ် လို့ ထူးထူးထွေထွေ မခံစားခဲံ့ရဘူး.. သူများတွေပျော်တာကြည့်ပြီး ပီတိဖြစ်ရတာ တခုပါပဲ.. "

"ခု ဒီတကြိမ်ကတော့ . မမ ဘ၀ ရဲ့ တတိယ အကြိမ်.. မမျှော်လင့်ပဲ ဒီနေရာမှာရှိနေခဲ့ပြီ"..

ကျမရဲ့ စကား ရှည်ကြီးကို တမေ့တမော လှမ်း နားထောင်ပေးနေတဲ့ ညီမငယ် ကို ကျမ အသာအယာ ငဲ့စောင်းကြည့်မိတယ်.. ကျမရဲ့ ဘ၀ အတွေ့ အကြုံတွေကို အလျင်းသင့်သလို.. ပြောပြနေကျမို့ ဒီတခါလဲ ပဲ သူမလေးက စိတ်ဝင်တစားနားထောင်ပေးနေတာကို တွေ့ရတာမို့ ကျမ နဲနဲတော့ ကျေနပ်သွားရပါတယ်... ဒီညီမလေးနဲ့ ကျမ အလုပ်တွဲလုပ်ဖြစ်တာ တနှစ်နီးပါး လောက်ပဲ ရှိသေးပေမဲ့ လူတဖက်သားအပေါ် အတော်လေး နားလည်ပေးတတ်သူလေး မှန်း ကျမသိခဲ့ရတာ တွေ့ပြီး မကြာခင်မှာပဲဆိုပါတော့..။ ကျမရဲ့ လွမ်းဆွတ်ခြင်းတွေကို ဒိုင်ခံ မျှဝေခံစားပေးနေသူလေးပါပဲ။ ကျမ ကဗျာတွေ ရေးတယ်ဆိုတာ အပြင်လောကမှာ သိတဲ့သူ ၃ ယောက်လောက်ပဲ ရှိတာထဲ သူမလေး က တယောက်ပေါ့..။ အကောင်အထည် ဖမ်းယူ ဆုပ်ကိုင်မပြနိုင်တဲံ့ ကျမရဲ့ လွမ်းဆွေးခြင်းတွေ၊ ကျမရဲ့တမ်းတခြင်းတွေ ကို နားလည်ပေးသလိုပဲ ဘာရယ်လို့ မဝေခွဲနိုင်သော သောကတွေ နဲ့ ဆောက်တည်ရာမရ ဖြစ်ဖူးတဲံ့ အခိုက်အတန့်တွေမှာလဲ သူမလေးက အားပေးဖော် ဖြစ်ခဲ့ပါတယ်။

ကျမနှလုံးသားထဲက အရာတော်တော်များများ ကို မျက်မှန်အောက်က မျက်ဝန်းတချက် မော့ကြည့်ရုံလေးနဲ့ မှန်းဆပြီး နားလည်ပေးတတ်သူလေးနဲ့ ကျမ ရဲ့ တတိယမြောက်နှစ်ကူးည ကို အတူဖြတ်သန်းရမှာ ကျမ စိတ်မကောင်း မဖြစ်မိပါဘူး..။

ကောင်းကင်ပေါ်မှာ ပြည်ပြည့်၀၀ ကြီးသာနေတဲ့ လမင်းဝါ၀ါ ကို မော့ကြည့်ရင်း တစုံတရာ ကို သည်းသည်းနင့်နင့် တမ်းတ မိတာကလွဲ လို့ ပေါ့လေ...

"လမင်းကြီးကို မော့ကြည့်ရင်း.. လွမ်းချင်နေတာမို့လား.. မမ..သဲပေါ်မှာ ကျောခင်း လှဲချ လိုက်လေ.. ကဲ စဉ်းစားမနေနဲ့တော့ .. ညီမတော့ လှဲ ပြီးနော်.. '..

ပြောလဲပြော လှဲ ချလိုက်တဲ့ သူမလေး ကိုစောင်းကြည့် ရင်း ထပ် စဉ်းစား မနေတော့ပဲ (ခြုံလာတဲံ ပုဝါ ကိုတော့ အောက်က ခင်း ဖြစ်အောင် ခင်းလိုက်သေးတယ်).. လှဲချ မိပါတော့တယ်..

'' ကမ္ဘာမြေကြီးအပေါ် ကျောခင်းတာ ဒါ ပထမ ဆုံးပဲ ညီမ ရ.. " ဆိုတဲ့ ကျမ စကား ကိုတော့ သူမ က နောက်ထပ် အံ့ သြဟန် မပြတော့.. ကျမ နဲ့ နေလာတဲ့ တလျှောက်လုံး ကျမ ဆီ က အံ့သြ ထူး ဆန်းဖွယ်ရာတွေ မကြာခဏမြင်ခွင့် သိခွင့်၊ ကြားနေခဲ့ရပြီး ပြီး ကိုး..။

(၃)

ညသန်းခေါင်ယံကတဖြည်းဖြည်းနဲ့ နီးကပ်လာပြီ..

ဟိုတယ်ရဲ့ ကပွဲခန်းမဆောင်နေရာဆီက မီးရှူး မီးပန်းတွေ လွှတ်တင်သံတွေ ကြားလာရပြီ..

ကမ်းခြေ နေရာ တချို့မှာတော့ လူငယ်လေးတွေ ဟိုစုစု ဒီစုစု နဲ့ ပျော်စရာနှစ်သစ် လို့ အော်ကြရဖို့ကို အသင့်ပြင်နေကြပြီ..

ခြေရင်းနားက ပင်လယ်ပြင်ကြီးထဲ မတော့ လှိုင်း အိအိလေးတွေ က အသံတိတ် ကမ်းနား ကို ပြေးလိုက် ခွာလိုက်....

ကောင်းကင်ပေါ် နှင်းမှုန်တွေ တဖြည်းဖြည်းနဲ့ ထူထူ လေး ဆင်းသက် လို့. မျက်နှာပေါ် လာနမ်း နေ..

အေးစိမ့်လာတဲ့ အချမ်းနဲ့ နင့်နင့်သီးသီး လွမ်းဆွတ်လာတဲ့ သူ့မျက်နှာ ကို မြင်ယောင်လာမိတဲ့ အခိုက်မတော့ .. နှုတ်ဖျားပေါ် က ကဗျာဟောင်းလေး တပုဒ် ရုတ်တရက် ခုန်ချ လာတော့တယ်......

ချစ်သူ့ ရင်ခွင်

..နှင်းစိုစို..

အအေးပိုတဲ့ ..ဒီလ

စောင်ခြုံတောင်.

လုံအောင် မနွေး နိုင်သမို့.

ချစ်ရိပ်ခို ရင်ခွင်နန်းကို..

လွမ်း.. တသသ..။

မမသီရိ (၂၆.၁၁.၂၀၀၈)

..........................................................

...

၂၀၀၉ ရဲ့ နောက်ဆုံး ညနေခင်း .. သူမ ရှိနေခဲ့တဲ့ ကမ်းခြေ မှာ.......

(၄)

၂၀၁၀ ရဲ့ ပထမ ဆုံး နံနက် ခင်းဟာလဲပဲ ခါတိုင်းနဲ့ မခြားနားစွာ.. အလွမ်းတွေ နဲ့ ထူထပ်ဆဲ.......။

မမသီရိ ( ၂၀၁၀ ဇန်န၀ါရီ)

ဘလော့နဲ့ဝေး.. ခင်ရာမင်ရာ မိတ်ဆွေတွေနဲ့ ဝေးနေခဲ့တာ အတော်ကြာခဲ့ပါပြီ..။ အလုပ်တွေက တခုပြီး တခု ပိလာနေတာက တကြောင်း၊ နဲနဲ အားမယ် လို့ ကြံလိုက်တဲ့ အခိုက်မတော့ ကွန်နက်ရှင် က အတော်ကြာကြာ မကောင်း၊ ကွန်နက်ရှင်ကောင်းပြန်တော့ ကွန်ပျူတာက ပြသနာ ၀င်နဲ့.... မိတ်ဆွေ တွေ ကို လွမ်းရုံမှ အပ မတတ်သာ ခဲ့....

စီဘောက်မှာ လာပြီး နှုတ်ဆက်ခဲ့ကြတဲ့ မိတ်ဆွေတွေ၊ မေးလ်နဲ့ လှမ်းပြီး စိတ်ပူပေးသူတွေ အားလုံး ကျေးဇူး တင်ပါတယ်.. ရေးထားတဲ့ ကဗျာ အကြမ်းတွေ အများကြီး ရှိနေတာမို့ အားတာ နဲ့ ဆက်တိုက်တင်ပေးသွားပါ့မယ်...

ခု တင်လိုက်တဲ့ ပို့စ်လေး က လဲ ရေးထား ကြာပြီ .. နှစ်ကူးပြီး ကတည်းက၊ ဒါလေးတောင် အဆုံး မသတ်နိုင်အောင် များခဲ့တဲ့ အလုပ် ကိုတော့ ရမယ် မဖွဲ့တော့ပါဘူး.. လေ...း)...။

Wednesday, December 30, 2009

နှစ်သစ်ဆုမွန်

နှစ်ကူးတော့မည်..
မှုံရီအတိတ်.. တဆိတ်မှုန်ဝါး
ကောင်းလား.. ဆိုးလား...
ဝေးသွား မပီ .. ကျန်ခဲ့ပြီ....

လာမည့် တနှစ်..
ဖြစ်မည့်အကြောင်း.. ကောင်းခြင်းသာ စုံ
ကုံလုံကြွယ်ဝ.. လိုတာ ရလို့..
ဆန္ဒဖို့ ညီ.. မင်္ဂလာပီတိ..
တ..တိုင်း ပြည့်စေ.. ဆုမွန်ချွေ သည်...

ချစ်သော မိတ်ဆွေ အား လုံး သို့...........။

ချစ်ခင်ရသော မိတ်ဆွေအားလုံးအတွက် နှစ်သစ်ကူးလက်ဆောင်ပါ။

မမသီရိ

Saturday, December 26, 2009

ပထမ ကဗျာ

သူများတကာတွေ နှစ်သစ်ကူး နဲ့ ခရစ်စမတ်နဲ့ ဟောလီးဒေးတွေ ယူကြ၊ ခရီးထွက် ကြ၊ ခရီးထွက်ဖို့ ပြင်ဆင်ကြ၊ မိသားစုတွေ ဆုံဖို့ စီစဉ်ကြ နဲ့ ကိုယ်ရ မဲံ့ခွင့်ရက်လေးတွေ အလဟသ မဖြစ်ရအောင် အမိအရ ခွင့်ယူနေကြပေမဲ့.. ကံ အကြောင်းမလှလို့ အလုပ်တွေနဲ့ လုံးချာလိုက်နေသူတွေ ထဲ ပါခဲ့သူ ကျမ ကတော့ ကိုယ်ဆတ်ဆော့ထားမိတဲ့ ပရောဂျက်တွေ နဲ့ ဘတပြန် ကျားတပြန် နှစ်ကုန်ထဲ မှာ နပမ်းလုံးနေရတာမို့ ခွင့်ရက်လေးတွေကို လွမ်းမောတသ စွာ မျှော်ငေးနေယုံလေး ဖြစ်နေရပါတယ်..။

အွန်လိုင်းထဲ မရောက်ဖြစ်တဲ့ ရက်တွေ က ခပ်စိပ်စိပ်၊ ခပ်ထပ်ထပ်၊ ရောက်ပြန်တော့လဲ မေးလ်ကလေး ကပျာကယာ စစ်၊ ကိုယ့်ဘလော့လေး ဖွင့်ဖြစ်တဲ့အခါ ဆို ဘေးဆိုဒ်ဘားထဲက ခင်ရာမင်ရာ ဘလော့လေးတွေ ထဲက မှ စိတ်ဝင်စားဖွယ် ခေါင်းစည်းလေးတွေ နဲ့ စာမြည်းလေးတွေ ဖတ်၊ ကသုတ်ကရက် လည်ဖြစ်တဲ့အခါ လည်၊ မန့်ခါမန့်၊ မမန့်နိုင်တဲ့ခါတွေ အများသား၊ တခါတလေတော့ မန့်ချင်ရက်နဲ့ ကွန်နက်ရှင်က အဆင်မပြေ နဲ့ ကိုယ့်ရဲ့ ဘလော့ဂါ အသိုင်းအ၀ိုင်းပိစိ လေးကိုတောင် ဧည့်ဝတ်မကျေတွေဖြစ်နေရပြီး မျက်နှာပူနေမိပါတယ်။ ခင်ရာ ခင်ကြောင်း Tag ထားတာတွေ ကိုလဲ မရေးဖြစ်မရေးနိုင်တာမို့ အားနာရတာ လဲ မရှိတတ်တော့....။

ကိုဆောင်းယွန်းလ Tag ခဲ့တဲ့ ဆိုးငြီးဖြစ်တဲ့ သီးချင်းများ အကြောင်း၊ ညီမငယ် နှင်း Tag ဖူးခဲ့တဲ့ ကမ္ဘာပျက်မယ် ဆိုခဲ့ရင် အကြောင်း၊ တူတော်မောင် ရီနိူမာန် Tag ဖူး တဲ့ နေချင်တဲ့ မြို့ကလေး အကြောင်း၊ မောင်မျိုး Tag ခဲ့ဖူးတဲ့ ဆုံဖူးချင်သူများ ဆိုတဲ့ အကြောင်းတွေ .. ရေးမယ်လို့ တေးထား လိုက်၊ စ ထားခဲ့ လိုက်ပေမဲ့.... အကြောင်းအမျိုးမျိုး ကြောင့် ရှေ့ဆက် မတိုးနိုင်ပဲ ဖြစ်နေတာမို့ Tag ထားတဲ့သူတွေ တောင် စိတ်နာနာ နဲ့ မေ့လောက်ကြပြီ ပေါ့....။

ဟိုတလောလေးကတော့ ကိုတင်မင်းထက်က သူ့ရဲ့ ပထမကဗျာ-ဆိုတဲ့ ပို့စ်ထဲမှာ ကျမ ကို သတိတရ Tag လာပြန်ပါတယ်။ အမှန်ပြောရရင် သူ Tag ခဲ့တဲ့သူတွေထဲမှာ ကျမ ကလွဲလို့ ကျန်သူတွေ အားလုံးက ပရောဖက်ရှင်နယ် တွေဖြစ်နေတာမို့ ကိုယ့်အကြောင်းကိုယ်ရေးရမှာ စာဖတ်သူတွေ အားနာမိ ပါတယ်..။

ဘာလို့လဲ ဆိုတော့ ကျမရေးခဲ့တဲ့ ဘယ်ကဗျာကိုမှ၊ ဘယ်မှာမှ၊ ဘယ်နေရာမှာမှ ပုံနှိပ်ဖော်ပြခဲ့ဖူးခြင်း မရှိလို့ပါပဲ။ ကျမဘလော့ထဲက About Me ထဲမှာရေးခဲ့သလိုပါပဲ.. ကျမ ကဗျာတွေ ရေးပါတယ်.. ဒါပေမဲ့ သိမ်းထား ရုံလေးပါပဲ..ပြီးခဲ့တဲ့ နှစ်ထဲမှာတော့ မထင်မှတ်ပဲ ဘလော့လေးတခု လုပ်ဖြစ်ပြီး ကိုယ်ရေးတာလေးတွေ မျှဝေခွင့်ရခဲ့တော့မှ ရေးဖြစ်တာတွေနဲ့ ရေးဖြစ်ခဲ့တာ တချို့ကို ဒီမှာ ချပြခဲ့တာပါ။

ကဗျာတွေ ကျမ ဘယ်တုန်းထဲက စရေးဖြစ်ပါလိမ့်လို့ ပြန်ပြောင်းစဉ်းစား ကြည့်တော့ ကျမ ရဲ့ ငယ်ဘ၀ တွေက အတွေးထဲ ပြေးပြေးလွှားလွှား ပြန်လည်ဝင်ရောက်လို့လာပါတော့တယ်..။

ကျမတို့ အရွယ်ငယ်ငယ်က ပန်းချီဆန်းထွန်းဆွဲတဲံ့ စာရွက်ပါးနဲ့ခေါက် ပို့စ်ကဒ်လေးတွေ အရမ်းခေတ်စားခဲ့ဖူးတယ်။ ဒီခေတ်လူငယ်လေးတွေကတော့မြင်ဖူးမယ် မထင်ပါဘူး.. (သိမ်းထားဖူးပေမဲ့ အပြောင်းအရွှေ့တွေ နဲ့ ဘယ်နားရောက်နေသလဲ အထားမှား တာမို့ ကြုံတုန်း ပြန်မတင်ပြပေးနိုင်တာ စိတ်မကောင်းဖြစ်မိသေး။ ) ကျမက ပန်းချီ (ရုပ်ပြ ခဲပန်းချီ) ဆွဲဝါသနာပါသူမို့ အဲဒီရောင်စုံ ပို့စ်ကဒ်လေးတွေက ကျမရဲ့ အသဲစွဲ စုဖြစ်ခဲ့တဲ့အရာတွေ ပေါ့..။ ကျမကို ပိုပြီးဆွဲဆောင်စေခဲ့တာက ပို့စ်ကဒ်နောက်မှာပါလေ့ရှိတဲ့ ဆရာမောင်ပန်းမွှေးရဲ့ ၃ ကြောင်းစပ်ကဗျာတွေပါ..။

မမျှော်ဘူးလေ့
စိတ်ကမေ့လည်း
ဝေ့ဝေ့မျက်လုံး လမ်းတဆုံး..။

ဆိုတဲ့ကဗျာလေးဆို ခုထိ မှတ်မိနေတုန်း.။ ပြီးတော့ အဒေါ်တယောက်လစဉ်ယူဖတ်တဲ့ တိုင်းရင်းမေ ဂျာနယ်ထဲမှာဆို အနယ်နယ်အရပ်ရပ် ကရေးပို့ကြတဲ့၃ကြောင်းစပ်ကဗျာတွေ ၂ မျက်နှာ ၃ မျက်နှာလောက်စီ ပါဖူးတယ် လို့ မှတ်မိနေသေးတယ်.. တ၀ ကြီး ဖတ် ပေါ့...။

မူလတန်းကလေးဘ၀မှာ ကဗျာရွတ်ပြီး အသင်အပြကောင်းတဲံ့ ဆရာမကျေးဇူးကြောင့် ဆရာကြီးမင်းသုဝဏ်ရဲ့ ကဗျာတွေ၊ ဆရာဇော်ဂျီ ရဲ့ကဗျာတွေကိုတမက်မောမော ဆိုဖူးသူမို့ အရွယ်လေးရလာတော့လဲ ကဗျာတွေကို ရင်ခုန်တတ်လာတယ် ဆို မှားမယ် မထင်ပါဘူး..။ ရွှေးသွေး တို့တေဇ တို့မှာ တဲ့ ကဗျာတွေ ကို ဖတ်တယ်..။ မြ၀တီ နဲ့ ငွေတာရီ မဂ္ဂဇင်းတွေမှာပါတဲ့ကဗျာတွေ ကို ဖတ်တယ်.. တခုတော့ ရှိပါတယ် .. ကျမ ရဲ့ ဦးလေးတွေက မိုးဝေတို့ ဘာတို့ မဖတ်တာမို့ အဲဒီ ကဗျာတွေ နဲ့တော့ ကျမ သိပ်မရင်းနှီးပါဘူး..။ အဲဒါကြောင့်လဲ ကဗျာဆရာ ကိုအောင်သာငယ်က ကျမ နဲ့ ကျမ ကဗျာတွေကို Old Fashion လို့ ပြောခဲ့တာ ထင်ပါရဲ့..။

သေချာ မမှတ်မိတော့ပေမဲ့ ကျမ ပထမဦးဆုံးရေးဖြစ်ခဲ့မဲ့ ကဗျာဟာ ၃ ကြောင်းစပ် ကဗျာတပုဒ်ဖြစ်မယ်ဆိုတာ သေချာသလောက်ရှိပါတယ်..။ ကျမ အသက် ၁၂ နှစ်အရွယ် ၈ တန်းကျောင်းသူဘ၀ ရဲ့ နွေရာသီ ကျောင်းပိတ်ရက်မှာ ဗလာစာအုပ်လေးတအုပ်နဲ့ စခဲ့တဲ့ ကျမ ရဲ့ ကိုယ်ပိုင် ကဗျာစာအုပ်လေး ရှိခဲ့တာ ကျမ မှတ်မိပါတယ်။ ကဗျာတိုစိလေးတွေ ကို ကိုယ်တိုင်ဆွဲတဲ့ ပုံတွေ နဲ့ တွဲပြီး စာအုပ်လေး လုပ်ထားခဲ့တာပါ..။ ၉ တန်းနှစ်အရောက်မှာ ကျမရေးတဲ့ကဗျာတချို့ ကို ရီးစားရှိတဲ့ သူငယ်ချင်းတွေ ကူးရေး ကြတယ်..။ စပယ်ပန်းနဲ့ ဖွဲ့ခဲ့တဲ့ အချစ်ကဗျာ (၀တ္တုစာအုပ်ဖတ်ရင်းရေးတာပါ.. တကယ့်အချစ်ကိုတွေ့လို့ မဟုတ်) တပုဒ်ဟာ ကျမ ရဲ့ ပထမ ဆုံး ၇ ကြောင်းလောက်ရှိမဲ့ ကဗျာပေါ့.. ကဗျာ ကို အလွတ်မရတော့ပါဘူး.. နောက် ခပ်ရှည်ရှည် တပုဒ်ကတော့ ၁၀ တန်းဖြေခါနီး နွေရာသီမှာ ကျောင်းနောက်ဖက် လယ်ကွင်းထဲက ပေါက်ပင်တွေ ရဲရဲ နီအောင် ပွင့်တာ ကိုကြည့်ရင်း အာရုဏ်မှာ တွန်တဲ့ ဥသြသံ ကို နားစွင့်ရင်းသူငယ်ချင်းတွေနဲ့ တသက်တာ ခွဲရတော့မဲ့ အကြောင်း၊ လွမ်းဆွတ်စရာ ကောင်းနေကြောင်းဖွဲ့ခဲ့တဲ့ ကဗျာ ပါ...။

အဲဒီကဗျာတွေ ပါတဲံ့ ကဗျာ ဗလာစာအုပ်ရယ်.. နောက် ထပ် ကဗျာတွေ စာအုပ်တ၀က်နီးပါးရှိမဲံ့ စာအုပ် တအုပ်ရယ် က လွန်ခဲ့တဲ့ ၃ နှစ်လောက်ကထိ ရှိနေခဲ့သေးပေမဲ့.. ခုတော့ ဘယ်နား ကျန်ခဲ့မှန်းမသိ ရှာမတွေ့ တော့ပါဘူး..။ ၁၉၈၉ နောက်ပိုင်း မှာ ရေးတဲ့ကဗျာတွေပဲ ကျန်နေပါတော့တယ်..။

ကျမ က ကဗျာတွေ ရေးသာရေးပေမဲ့ မဂ္ဂဇင်းတွေ ပို့ဖို့ စာစောင်တွေ ပို့ဖို့ ဘယ်တုန်းမှ စိတ်ကူး မ၇ှိခဲ့ဖုပါဘူး။ ကျမ ကဗျာတွေ ရေးတယ်ဆိုတာ လူတိုင်းလဲ မသိပါဘူး။ ကျမနဲ့ အလွန်တရာ ရင်းနှီးလွန်းတဲ့ သူ မိတ်ဆွေ တချို့ ကိုပဲ ကျမ ကဗျာ တချို့ ကိုပေးဖတ်ခဲ့တာပါ..။ အထူးသဖြင့် မိန်းခလး မိတ်ဆွေ တချို့ ပဲ သိတာမျိုးပါ... ယောင်္ကျားလေး သူငယ်ချင်းတွေ ကျမ ကဗျာရေးတာ မသိကြပါဘူး။ ခုလဲ အပြင်မှာ ကျမကို ကဗျာရေးတဲ့သူ ဘလော့ ရေးတဲ့သူ လို့ သိတဲ့သူ မရှိသလောက်ပါ ပဲ..။

လူတွေ ရှေ့မှာ ချပြခဲ့ဖူးတဲ့ ကျမရဲ့ တပုဒ်တည်းသော ကဗျာကတော့ကျမရဲ့ ဇာတိမြို့ကလေးမှာကျင်းပ ခဲ့တဲ့ ကိုဖုန်းမော် တနှစ်ပြည့် အခမ်းအနား မှာ ကျမ ရေးဖွဲ့ပြီး ကျမ ကိုယ်တိုင် တက်ရွတ်ခဲ့တဲ့ ကမ္ဘာမကျေဘူးဟေ့ လို့ခေါင်းစဉ်တပ်ခဲ့တဲ့ကဗျာပါ..။ အဲဒီတုန်းက ကျမ က ကျမတို့မြို့ကလေးရဲ့ လူ့ဘောင်သစ် ဒီမိုကရက်တစ်ပါတီမှာ (တဦးတည်းသော မိန်းခလေး) တွဲဖက်စည်းရုံးရေးမှူး တာဝန်ယူပေးအပ်ခြင်းခံခဲ့ဖူး ပါတယ်..။ အဲဒီနေ့က ဆွမ်းကျွေးပြီးတော့ ဟောပြောပွဲအစီအစဉ်တွေကြားထဲမှာ ကျမရဲ့ ကဗျာကို ရွတ်ခဲ့တာပါ..။ ဖတ်ရင်း နဲ့ အံကြိတ် မျက်ရည် ၀ဲခဲ့ရတဲ့ ကဗျာ တပုဒ်..။ အဲဒီကဗျာ အပါ အ၀င် အဲဒီကာလမှာ သွေးစွန်းတဲ့တော်လှန်ရေး အကြောင်းနဲ့ ဖိနှိပ်မှု တွေ၊ မတရားမှုတွေ အကြောင်းတွေပါတဲ့ ကဗျာတွေ ကျမ ရေးဖြစ်ခဲ့ပါသေးတယ်..။ ဒါပေမဲ့ ၁၉၈၉ ခု ဇွန်လ မှာတော့ ကျမတို့မြို့လေးရဲ့ လူ့ဘောင်သစ် ဒီမိုကရက် တစ်ပါတီရဲ့ မြို့နယ် ကော်မီတီဝင်အားလုံးနီးပါး (ကျမ နဲ့ ထွက်ပြေး သွားတဲ့ အတွင်းရေးမှူး ကလွဲလို့) အဖမ်းခံခဲ့ရတဲ့ အခိုက် ကျမရဲ့ မိခင်က ကြောက်လန့်တကြား အိမ်မှာ ရှိတဲ့ကျမရဲ့စာရွက်စာတမ်း မှတ်စုတွေ၊ ဒိုင်ယာရီ နဲ့ နိုင်ငံရေးအတ္ထုပတ္တိစာအုပ်တွေ အားလုံး ကျမ မသိအောင် မီးရှို့လိုက်တာမို့ ရေးထားတဲ့ ကဗျာစာရွက်တွေ ပါ ပါ သွားခဲ့ပါတယ်... ။ (ကျန်တဲ့ အဖွဲ့ဝင်တွေ အားလုံး ဖမ်းခံရပြီး ကျမ တယောက် ထဲ ဘာလို့ ကျန်နေခဲ့သလဲ ဆိုတာ ဒီနေ့ထိ ကျမ နားမလည် နိုင်သေးပါဘူး.. .အဲဒီ အချိန်မှာ မိဘတွေ ရှိတဲ့ နယ် ကို ရောက်နေခဲ့ လို့များလား.. ဒါမှ မဟုတ်တဦးတည်းသော မိန်းခလေးမို့လို့ ချန်ထားခဲ့သလား မသိပါဘူး... )..

ကျမရဲ့ ကဗျာတွေကို ဘယ်မှ မပို့ဖူး၊ ဘယ်မှာမှ မပါဖူးပေမဲ့.. စာရေးဆရာ ဆရာကြီး ကမ္ဘောဇခင်လှိုင် ကတော့ ၁၉၉၀ ၀န်ကျင်းလောက်တုန်းက မြန်မာ့အလင်း နဲ့ ကြေးမုံ သတင်းစာတွေမှာ ဖော်ပြခဲ့တဲ့ သူ့ရဲ့ အခန်းဆက် ခရီးသွားဆောင်းပါးတွေထဲမှာ ကျမ ကို ကဗျာဆရာမ ရယ်လို့ သညာ တပ်ပြီး (ကျမရဲ့ဇာတိမြို့အမည်နဲ့ကျမရဲ့ အမည်ကိုတွဲရက်) ဖော်ပြပေးခဲ့ဖူးတာလေး က ထူးခြား မှု တခု လို့ ပြောရမယ် ထင်ပါရဲ့.. ။ ကျမ တာဝန်ကျတဲ့ မြို့ကလေးမှာ ဆရာကြီး နဲ့ မမျှော်လင့်ပဲ အမှတ်တမဲ့ ဆုံတွေ့ ခင်မင်မိကြခဲ့ရင်း .. ကျမ ကဗျာတွေရေးတာသိတဲ့ ကျမ မိတ်ဆွေ ဆရာမလေးက ကျမ ကိုမြှောက်ပင့် မိတ်ဆက်ပေးတဲ့အပြင် ဆရာကြီး ရဲ့ မှတ်စု စာအုပ်ထဲမှာ ဆရာကြီး ပြန်ခါနီး၊ ဆရာကြီးအတွက် အမှတ်တရ ကဗျာတိုလေး တပုဒ် ရုတ်တရက် ရေးဖွဲ့ ပေးခဲ့လို့များ အဲသလို ဖော်ပြပေးခဲ့တာလဲ ဖြစ်ချင်ဖြစ်မှာပေါ့.. အဲဒီ သတင်းစာ ရောက်လာတော့ ကျောင်းက ဆရာမတွေနဲ့ ဖတ်ရင်း မျက်နှာပူပူနဲ့ ရီခဲ့ကြရသေးတာ မှတ်မိသေးတော့..။

အဲဒီတုန်းက ကျမရေးခဲ့တဲ့ ကဗျာ အများစု က အိမ်ဝေးနေတဲ့ သမီးတယောက်ရဲ့ အိမ်အလွမ်းတွေ နဲ့၊ ကျမ တာဝန်ကျရာ မြို့လေးရဲ့ အလှအပတွေ၊ ရာဇ၀င်တွေ ကို ရာသီ ဖွဲ့တွေနဲ့ တွဲဖက် သီဖွဲ့ခဲ့တာ များ ပါတယ်..

ကျမရဲ့ တပုဒ်တည်းသော ဖယောင်းဖောက်ကဗျာလေးကတော့ ဒီမှာပါ..။

ကျမ ကျောင်းဆရာမ လုပ်ခဲ့တဲ့ကာလတုန်းဆီက ဆို စာမေးပွဲ မေးခွန်းတွေကို ဖယောင်းစက္ကူပေါ်မှာ စူးနဲ့ဖောက် ရေးပြီး မီးချောင်းနဲ့ လှိမ့်ပြီး မိတ္တူပွားကြရပါတယ် ..။ စာကူးစက်တွေက အထက်တန်းကျောင်းကြီး တွေ နဲ့ မြို့နယ်ပညာရေးမှူး ရုံးတွေမှာလောက်ပဲရှိတာမို့ အလယ်တန်းကျောင်းတွေ မူတန်းကျောင်းတွေ မှာ တော့ ဒီလိုပဲ မေးခွန်းလှိမ့်ကြရတာပါ..။ ကျမ သင်တဲ့ အဌမတန်း အင်္ဂလိပ်စာ မေးခွန်းဖောက်တော့ စာမျက်နှာ တပိုင်း ပိုနေတာမို့ ကဗျာတပုဒ် လောက် ဖောက်ကြည့်ကောင်းမလား စိတ်ကူးရပြီး ဖောက်ကြည့်ခဲ့တာပါ...။ အားလုံး ကော်ပီတွေ ထွက်လာတော့ ကျောင်းအုပ်ဆရာမကြီး မသိအောင် ကျောင်းအကူ ကို အကူအညီတောင်းပြီး တိတ်တိတ်လေး ၂ ယောက်သား ဖြတ်ကြရတာပေါ့..း)...။ ၈ တန်းကျောင်းသား ၂၀ ကျော် ရှိတာမို့ ကဗျာစာရွက် ၂၀ ကျော် ရခဲ့တယ်... ဒီအတိုင်းပဲ သိမ်းထား ခဲ့တာ... ခုထိ ကျန်တုန်း ဆိုပါတော့..း)..။

အဲဒီ ကဗျာလေး ကိုပဲ ဒီဘလော့ စရေးတဲ့ နေ့မှာနေတတ်သလို ဆိုပြီးအဖွင့်ကဗျာ အနေနဲ့ နဲနဲ ပါးပါး ပြင်ပြီး တင်ထားခဲ့ပါတယ် ..။ ဖယောင်းဖောက် ကဗျာ မူရင်းကတော့ ..

နေတတ်သလို

ပျော်စရာ...
တွေ့လာရင်ပျော်လိုက်...
ရင်ထဲခိုက်အောင် မဟုတ်ပါ...

ငိုစရာ...
တွေ့လာရင် ငိုလိုက်...
ရင်ထဲခိုက်အောင် မဟုတ်ပါ...

နေ့...
ည.......ရာသီ

သံသရာ ဒီစက်ဝိုင်းမှာ...
နေရတာ ဘာမဟုတ်...

ခဏတာ အလည်ရောက်ကြတာမို့...
အခြေအနေ...
ဝန်းကျင်တွေ အားလုံး...
ပြေပြစ်အောင်အသုံးချလို့....

လာလမ်းကို ပြန်ချိန် ကျရင်...
ဝေဒနာ ရင်မှာ ပါမသွားစေဘို့...

ဖြေစရာရှာကာ ဒီဘ၀
နေကြမယ်လေ....။

(၃၀.၇.၁၉၉၀)

ဒီကဗျာ ကိုပဲ ကိုရင်နော်နဲ့ ခင်လေးငယ် တို့ Tag ဖူးတဲ့ ဆန္ဒရှိတဲ့ အဟောင်းလေး ဆိုတဲ့ ပို့စ်မှာ ပြန်လည်ဖော်ပြဖူးပါသေးတယ်..။

နောက်.. ပထမ ဆုံး .. တခြားကဗျာဆရာ၊ ဆရာမတွေနဲ့ အတူတူ ဖော်ပြခံရတယ်လို့ ပြောရမဲံ့ကဗျာ တပုဒ်က တော့ ကိုအောင်သာငယ်၊ ကောင်းကင်ကိုနဲ့၊ မောင်ဖုန်းမြင့်တို့ စီစဉ်ခဲ့တဲ့ ပြိုင်တူလင်းတဲ့ ကောင်းကင် ဆိုတဲ့ သင်္ကြန် ကဗျာစုမှာ ပါခဲ့တဲ့ မပန်ဖြစ်တဲ့ ပိတောက်ခက်မှတ်တမ်း ဆိုတဲ့ ကဗျာပါ.. ကဗျာစုထုတ်မယ်.. ကဗျာတပုဒ်လောက် အဆင်ပြေရင်ရေးပေးပါလို့ ပထမ ဦးဆုံး တောင်းခံ ခဲ့ရတဲ့ အခွင့်အရေး ဖြစ်ပြီး. ကျမ ကို ကဗျာ ဆရာ စာရင်းသွင်းခြင်း ခံရတဲ့ ကဗျာစု ဆိုပါတော့ .. တကယ်တော့ အဲဒီ ကဗျာကလဲ ကဗျာဟောင်း တပုဒ် ပါပဲ.. မှတ်စု စာအုပ်ထဲ ပြန်ကြည့်တော့ ကဗျာရေးတဲ့ နေ့စွဲ က ၅.၅.၁၉၉၀ ပါတဲ့...။

ကဲ .. ကို တင်မင်းထက်ရေ.. ဘယ်လို ပုံနှိပ်စာလုံးတွေနဲ့ မှ ပုံနှိပ်ဖော်ပြခြင်း မရှိသေးတဲ့ ကဗျာရေးသူ၊ ကဗျာချစ်သူ တယောက်ရဲ့ မရှိမဲ့ ရှိမဲ့ မှတ်တမ်းလေး နဲ့ ပထမ တွေ အကြောင်း သောင်းပြောင်းထွေ လာလေး မျက် စိနောက်အောင် ရေးလိုက်ပြီ မို့ ကျေနပ်မယ် လို့ ထင်မိပါတယ် ရှင်..။

အားလုံးကိုချစ်ခင်လေးစားသော

မမသီရိ

Sunday, December 13, 2009

ချစ်ခြင်း မှာ အကြိမ် ကြိမ် သေ...

လွန့်ကနဲ တချက် ရုန်းအကြွ
မင်း နှုတ်ခမ်းထောင့်က အလှကလေးမှာ
ဗုန်းဗုန်းပါအောင် ကျဆုံး
ငါ့ နှလုံးသားတွေ ကြွေ.....

ကောင်မလေးရေ...
ဘယ်လိုမှော်တွေအောင်လို့ မင်း.. ဘယ်လိုလှ..
မင့် အပြုံးမှာ ဘာတွေ ချယ်..
မင့် နှုတ်ခမ်းလေးတွေ ဘာနဲ့ ထွေး..
မင်း ပါးကလေး တွေက ဘယ်တန်ခိုးနဲ့ မို့..
မင့် သွားကလေးတွေ က ဘယ်အစွမ်း နဲ့ ကြွေရောင်ပြေ...
မင်း မျက်လုံးကလေးတွေ ဘာဂါထာနဲ့ မှုန်း
မင့် ပခုံးကလေး က ဘာလို့ ပြေ...

မင်း ဆံနွယ်တွေ ဘာလို့ လက်..
မင့် လက်ကလေးတွေ ကရော ဘာလို့ နွယ်..
မင့် ခြေဖမိုး လေးရယ်.. ဘယ်လို ဖောင်းဖောင်း.. အိ....
ဒီကမ္ဘာပေါ် ရှိသမျှ အလှဆုံး အရာတွေ
မင်း ကို ဆရာ.. ခေါ် ရချည့်. ...

တဒိတ်ဒိတ်နဲ့ ငါ့ ရင်တွေ..
ထိမ်း မရ ချင်ပြီ ကောင်မလေး ရဲ့..

နင့် မျက်တောင် တချက် အခပ်
ငါ... လှလှ ပပ သေ...

နင့် မျက်လုံး တချက် အ၀င့်..
ငါ... လှလှ ပပ သေ...

နင့် အပြုံး တချက် အလက်...
ငါ.. လှလှ ပပ သေ....

နင့် ခြေ တချက် အလှမ်း...
ငါ.. လှလှ.. ပပ သေ..

နင့် ခေါင်း တချက် အငဲ့..
ငါ လှလှ ပပ သေ....

ကောင်မလေး ရေ...
နင့် ကို ဖျတ်ကနဲ... ချစ်မိခြင်းထဲ
ငါ... လေ.. သေ ပြီး ရင်း ..သေ.....။

မမသီရိ

ကျမရဲ့ အချစ်ကဗျာတွေ ဖတ်ရင်း.. ကဗျာထဲက ချစ်သူကို မနာလိုဖြစ်နေကြသော..း)....
ချစ်ခင်ရသော.. မောင်လေး.. အောင်အောင့် အတွက် နဲ့၊ မောင်ငယ်များ ဖြစ်ကြတဲ့ ကဗျာဆရာလေး လင်းဒီပ၊ ကိုရင်နော်၊ ကျမကဗျာတွေ အမြဲလာဖတ်ကြတဲ့ မောင်ငယ်ဏီလင်းညို၊ ညရဲ့ကောင်းကင်၊ မောင်ဝင်းဇော် (welcome)၊ မောင်လေး ဖိုးသူတော်၊ တူတော်မောင် ရီနိုမာန်၊ ဘလော့ဂါတယောက် မဟုတ်သော်လည်း သူ့ ချစ်သူဖတ်လို့ သူလဲလာဖတ်တာပါ ဆိုတဲ့ ကိုဇော်ထွန်း၊ ကိုဇော် (ခြေလှမ်းသစ်)၊ မောင်ငယ် စိတ်စမ်းရေ၊ ကလေးလေး ခရေတန်၊ လူပြိုကြီး အကိုကြီးရွှေရတု တို့ ကိုယ်စား ရေးဖွဲ့ ရင်းနဲ့ နှစ်သစ်ကူး လက်ဆောင်အဖြစ် ပေးလိုက်ပါသည်။ ပုံ ကတော့ ငယ်ငယ်တုန်းက ဆွဲခဲ့တာ..။

အစတုန်းကတော့ လူပျိုလေးတွေ အတွက်ပဲ လို့ ရည်ရွယ်ခဲ့တာ ပါ..း).. ။နောက်.. စဉ်းစားတော့.. ကိုဆောင်းယွန်းလနဲ့ ကိုတင်မင်းထက် ကို ပြေးမြင်ယောင်မိတယ်..း)..။.. ကိုဆောင်းယွန်းနဲ့ ကိုတင်မင်းထက် ရေ.. ချန်မထားခဲ့ပါဘူး ရှင့်.. နော်.. . ။

တကယ်တော့ ချစ်ခြင်း ကြောင့် ကိုယ့်ရဲ့ ချစ်သူ ဟာ ကမ္ဘာပေါ် မှာ အလှ ဆုံး ဖြစ်နေတတ်တာလေး ဖွဲ့ ပေးမိတာပါ ..။

ကောင်မလေး.. ရဲ့ အလှ မှာ ကြွေကျပြီး နှစ်သစ် မှာ ပျော်ရွှင်ကြပါစေ..။

ချစ်ခင်သော.. မမသီရိ

Saturday, December 05, 2009

သဲစုတို့ထက်ပိုသော ... ကြယ်စုတို့ထက်ပိုသော.....

ကွေ့ဝေ့သောင်စပ် ..
ကမ်းငွေလှက..
ဖွေးဖွေး ရွရွ... သဲ မှုံစ တွေ...
မောင်.... လေမပျင်း...
ရှင်း ရှင်း စိတ်ဝယ်...
ရည်ချင်တယ် ဆို....
ရာပေါင်း ကုဋေ .. ရှိလိမ့်လေလား..
သန်းပေါင်း ရာ ..ထောင်.. ရှိယောင် တိကျ..
ရလို ရလိမ့် .. မောင်နှစ်သိမ့်ရာ....

ပြန့်ပြော ကျယ်လွင့်
မိုးဆင့်တိမ်လွှာ..
ဝဠာတခို.. ညမှာ စိုလဲ့
ပြိုးပြိုး ပြက်ပြက်ေ၇ွှရည်လက်တဲ့
စိန်ပွင့်ရောင်စုံ.. ကြယ်မှုံလေးတွေ
ကုဋေ ဘယ်လောက် ပြည့်မောက်မလဲ..
မောင် သိချင်လို့ ရည်စို့ရယ်ဆို ..
ပိုလို မရှိ သိချင်သိလိမ့် ..
မောင်နှစ်သိမ့်ရာ
တိုင်းတာတခု.. ရလု ပါတယ်....

မောင့်ရဲ့ အပေါ်
စည်းတွေကျော်လို့ ..
မေတ္တာ သွန်းဖြိုး.. ရင်တွင်း မိုးနှယ်..
သဲဝယ်ချည်ရစ်.. နှောင်တွယ်ချစ်ခဲ့ ..
ကျမ အဖြစ်.. မောင်.. တွက် စစ်ရင်..
နုပျိုချိန်များ ကုန်ဆုံး သွားလို့..
ဇရာနွမ်းတိုင်.. မဆုံး နိုင်ပဲ..
ကျယ်ပြန့် လွင့်ပြော ..မေ့.. မောင်.. မော မယ်..
စိုးလို့ပါကွယ်.. မရည် ပါနဲ့....

အသက်ရှူသရွေ့ ..
အချစ်နေ့ ပါ...

ပိုတာ မဟုတ်..
ချစ်သရုပ် တွေ.. ပီပြင်နေခဲ့..

ဆထက်ထမ်းပိုး....
တိုးလို့ချစ်လာ.. မေ့မေတ္တာ တွေ
ကုဋေ ဆယ်ဆ .. ထောင်မက အောင်..
မောင် သိမှာ ပါ.. အရာရာ ကို..
မောင့်ရဲ့ သဘော... မောင်ပြော သမျှ..
မောင့် အလိုကျ ... ဖြစ်စေရခဲ့
ကိုယ့်ဖက်မတွေး ..ရှေ့ ရေး မမျှော်..
မောင်ပျော်ဖို့ အတွက်....
ကျမ ချစ်တာ.. ကမ္ဘာပေါ် က
သဲမှုန့် ထက် ပို... ကြယ်ပျိုထက် ကဲ..
ကျမ ရင်ထဲ.. မောင့် ကို ချစ်တဲ့ အချစ်တွေ လေ.........။

မမသီရိ

Thursday, November 26, 2009

ပုထုဇဉ်

(သူ့ဖုန်းနံပါတ်လေး နှိပ်..
ဟဲလို ..ဟဲလို.. ဆိုတဲ့ အသံလေး အကြား
အသာ အယာ ပိတ် ပြစ်လိုက်..
...
အဲဒီ ဟဲလို.. ကလေး.. က
..
ရင်တွေ ခုန်စေသတဲ့
အလွမ်းတွေ ပြေစေသတဲ့..
ခွန်အားတွေ ဖြစ်စေသတဲ့......
ရူး လိုက် ပုံ များ..........)

ရင့်ကျက်သင့်ပြီ..
ဒါပေမဲ့ မရင့်ကျက်နိုင်သေး..

ချန်ခဲ့သင့်ပြီ..
ဒါပေမဲ့ မချန်ရက်နိုင်သေး..

မေ့လိုက်သင့်ပြီ..
ဒါပေမဲ့..မမေ့စွမ်းနိုင်သေး...

ချစ်နေဦးမည်..
ဘ၀ အဆက်ဆက် ချစ်ခွင့် ရှိသရွေ့

ဒါသည်ပင်လျှင် ပုထုဇဉ် ....

မမသီရိ
(၂၇.၁၁.၀၉)

Sunday, November 22, 2009

ရင်မှာ..ဆောင်း.....

အချိန်တွေ အတော်လွန်ပြီး ခါမှ....
မပြောမဆို..
ကသုတ် ကရက်..
ကဆုန်စိုင်း.. ၀ုန်း ဒိုင်း ကျဲ လို့..
ရုတ်တရက်.. တံခါးခေါက်.. ပေါက်ချလာတဲ့... ဆောင်း....

လာချိန်တန်လျက်
မရောက်ခဲ့ ပဲ..
ရှိချိန်အလွန်..ပန်းဇွန် တွေ ငိုတော့မှ
ဥတ္တရ လေတွေ.. တပွေ့ တပိုက် နဲ့..
ခိုက် ခိုက် တုန် မလို..
လွင်ပြင်ကို ဖြတ်.. ယာယီ ခဏလေး .. လား.. ဆောင်း...

မင်း အလာ နောက်ကျခဲ့တော့..

မိုင်းသောင်းချီ အဝေးက
ထောင်ပေါင်း မရည်နိုင်တဲ့
လာနေကျ အနွေးလို ငှက်တွေ တောင်
ဆောင်းခိုဖို့အရေး..ဇဝေဇ၀ါ မရေ မရာ ဖြစ်လို့
နေရာသစ်ကို ခရီးဆက်သွားကြတယ် ဆောင်း ရေ့..

ဘာပဲ ပြောပြော..
အဖူး တွေ အသင့်နဲ့ စောင့်နေတဲ့
ဆောင်တော်ကူး ဂေါ်သဇင် တွေက
ပျော်နေကြ မှာတော့ အမှန်..

တော်ဝင် သဇင်တွေ ကသာ...
ရာသီ အို အတွက်.. မျက်နှာတွေ ညိုနေကြလေ ရဲ့..

မေမြို့ ပန်းတွေ
ချယ်ရီတွေ..
ဒေလီယာတွေ..
စိန်ချယ် တွေ..
သော်က တွေ....

အင်း... သူတို့ တွေ ရင်ထဲက အကြောင်းတော့
ငါ.. ကောင်း ကောင်း မသိခဲ့ဘူး ကွဲ့..

ခေတ်ပေါ် ဆောင်း.. အတု
ခေတ်ပေါ် နှင်း.. အတု..
နည်းပညာ.. ဆန်းဆန်း တွေ ရဲ့ အလယ်မှာ
အဲဒီ..ပန်းကညာတွေ က..
ဆောင်း.. အစစ်ကို မေ့ချင် မေ့နေ.. နိုင်သလို..
နှင်း.. အစစ် ကိုလဲ လွမ်း ချင်မှ လွမ်းကြတော့ မှာလေ...

ရာသီ .. ဆိုတာ..
စားသုံးသူ ဦးစားပေး ခေတ်ကြီး ထဲ..
တခါ တရံ များစွာ အတွက်...
မေ့လျော့ခြင်း ခံခဲ့ ရပြီ ကွဲ့ ဆောင်း ရဲ့....
(မင်း ကလဲ .. လာချင်မှ လာမယ် ဆိုတဲ့ အချိုး နဲ့
အချိန် မှ မလေး စား တော့တာ ကို..)

ပုံ ရိပ်အဟောင်းတွေ ထဲ မှာတော့
နှင်း ဝေတဲ့ ဆောင်းနံနက် တွေက
ရာဇ၀င် တွင်... လို့....

ဆောင်း ရယ်... နှင်း.. ရယ်... ကိုယ့် ချစ်သူ.. ရယ်......

နှင်း..........ငွေ ရောင်ဖြူလွ.. တူစွ သန္တာ ရယ်.....

ခရမ်းနု ရောင်.. နှင်း မှုန်လေးတွေ နဲ့ .. ပြည်မှာဆောင်း ရယ်.....

အိုး....
လှ လိုက်လေခြင်း...
ဆောင်း..သတင်း.. နှင်း. သတင်း တွေ...

ခုတလော ဆောင်း ကတော့..

တွန့် တွန့် တိုတို
မပြိုချင့် .. ပြိုချင်...
မာန ရှင်.. နှင်း ..ကိုတဲ့...မြှောက်ပင့် ပေးနေ ခဲ့..လို့...

အေးတော့ အေးချင် ပါရက်...
နှင်း မပြို တဲ့ ညတွေ များများ.. လာ......

အဲဒီ.. နှင်း မပြိုသော ညတွေ မှာ...
ငါ......... မင်း ကို.. လွမ်းရမလား... ဆောင်း.........................။

မမသီရိ
၂၂.၁၁.၀၉

ဓါတ်ပုံက အင်တာနက်ကပါ။